24 deju kolektivu doncuotuoji apsavīnuojuši dejis “Meitu muote” videoklipā
Rokstu sagataveja: portals lakuga.lv
Itamā nedeļā publicāts i lelu skateituoju atzineibu socialajūs teiklūs dabuojs videoklips, kurā doncuotuoji nu 24 Latvejis deju kolektivu izdoncoj grupys “Laimas Muzykantu” dzīsmi “Meitu muote” Juoņa Ērgļa horeografejā. Klipa idejis autors i režisors ir Jurs Gogulis nu videoagenturys “Wind Films”, duovynojūt video Dzīšmu i deju svātku video arhivam.
Kai līcynoj publiski daīmamuo informaceja, videoklipā pīsadalejuši doncuotuoji nu 24 A grupys deju kolektivu nu vysaidu Latvejis vītu – Līpuojis, Daugovpiļs, Valmīrys, Jelgovys, Jiurmolys, Ūgris, Limbažu, Jākubpiļs, Siguldys, Lelvuordis i Reigys, kai ari kluotyn fiļmiešonā beja grupys “Laimys Muzykanti” muziki i pats tautysdzīsmis apdaris autors Artūrs Uškāns.
Klipa režisori ir diveji – Jurs Gogulis i Juoņs Romanovskis – tys ir jūs obeju kūpeigs dorbs i doncuotuoju videoklipu taiseišonā jim ir cīši lela pīredze. Ari niu bejuse gribiešona īprīcynuot skateituojus ar kaidu jaunu dorbu, kurā īmyužynuota deja. Klipa fiļmiešona nūtykuse Reigai piec vareibys “tyvuokajā” autentiskajā Latgolys vītā – Latvejis Etnografiskuo Breivdobys muzeja Latgolys sātā.
Dzīsme “Meitu muote” (Meitu mōte) ir skaņdorbs – latgalīšu tautysdzīsme Artūra Uškāna apdarē – nu grupys “Laimys Muzykanti” pyrmuo, 2023. gods rudinī izdūtuo albuma “Gonam gona”. Deju itai muzykai radejs horeografs, ituo gods Dzīšmu i Deju svātku izvaduma “Mūžīgais dzinējs” muokslinīcyskais vadeituojs Juoņs Ērglis, tū taisūt atbiļstūši muzykys raksturam. Deja pyrmū reizi īstudāta 2005. godā i itymūs svātkūs tū doncuos ari vysi A grupys deju kolektivi.
Videklipa fiļmiešonā pīsadalejuši doncuotuoji nu DA “Pērle”, DA “Austris”, TDA “Ačkups”, TDK “Zalktis”, TDA “Teiksma”, TDA “Līgo”, RTU TDA “Vektors”, TDA “Gatve”, TDA “Liesma”, LU TDA “Dancis”, DA “Daiļrade”, TDA “Kalve”, TDA “Katvari”, TDA “Diždancis”, TDA “Rotaļa”, JDK “Sadancis”, TDK “Banga”, JDK “Vizbulīte”, TDA “Gauja”, TDA “Ritenītis”, JDK “Pūpolītis”, TDA “Ogre”, JDK “Zālīte” i DA “Laismeņa”, dejis solistis ir Kate Vulāne i Sandra Kauranena, bet operatori – Girts Ceriņš i Mārtiņš Naglis.
Īsavieršona videoklipa fiļmiešonys aizkulisēs:
