Rokstu sagataveja: portals lakuga.lv

Interneta žurnala “Satori” rodūšuo rokstūšūs autoru vosorys nūmetne ir kasgadejs pasuokums, kas itūgod nūtiks nu 22. da 27. augusta Bolvu nūvoda Upeitis kulturtelpā. Nūmetnis dalinīkim byus vareiba dorbuotīs vīnā nu treju vierzīņu: prozys, dzejis voi esejistikys meistarklasē.

Itūgod “Satori” rodūšuo nūmetne byus jau 11. reizi. Par nūmetnis temu i tekstu caurveju motivu izvālāta “apsiesteiba”. Kai viestej nūmetnis organizatori: “Mes grybātu dūt telpu refleksejai par sovom, cytu i sabīdreibys apsiesteibom, nanūsūdeit, tok pieteit tuos.”

Kotru meistarklasi vadeis kaids nu “Satori” autoru. Esejistikys darbneicai tei byus Santa Remere, dzejis darbneicu vadeis Henriks Eliass Zēgners, sovpus prozys – Svens Kuzmins. Sūpluok ar raksteišonu saisteitom darbneicom, nūmetnis organizātuoji dalinīkim pīduovuos ari cytys meistarklasis. Pīsadaleišona “Satori” nūmetnē ir bezmoksys, tok dalinīkim pošim juosadz sovys transporta izmoksys, kai ari juoveic moksuojums par kūpeigom iesšonys reizem.

Interneta žurnala redaktors i projektu vadeituojs Andrejs Vīksna stuosta, ka kotru godu rodūšajai nūmetnei dasasoka aptyvai 60 pretendentu, tok reala daleiba teik apstyprynuota trešdaļai. “Mes raugom saglobuot zynomu balansu – kab nūmetnē reizē pīsadaleitu tī autori, kuri jau ir izdavuši sovys gruomotys i tykuši pi zynomys atpazeistameibys, taipoš ari jaunī autori. Tys ir eipaši svareigi taišni jaunajim autorim, kab jim byutu vareiba teikluotīs i rast jaunus kontaktus.” Kotru godu nūmetnis nūslāgumā nūteik ari publiski lasejumi, i lobuokī teksti teik publicāti.

Vaicuots par nūmetnis vītys izvieli, Andrejs Vīksna stuosta: “Nūmetne kasgadeji nūteik cytvīt, pādejūs godūs asam poši publiciejuši aicynuojumu vītom atsasaukt, tai ari poši mekliejuši kaidys interesantys vītys. Upeite beja dasasacejuse jau vīnā nu īprīškejūs godu, tok tod tehnisku īmesļu deļ nasaguoja. Itūgod uzrunuoju jūs pats i, cytastorpā, ari cīši gribieju, kab nūmetne byutu taišni Latgolā, kur da šam vēļ nav nūtykuse. Mums ir svareigi, kab vītys atmosfera i vierteibys byutu leidzeigys myusejom, tok byutiski ir ari praktiskī aspekti par telpys pīmāruoteibu tik lelam cylvāku skaitam i finansialuos īspiejis. Itūgod vyss labi sasaslēdze.”

Sevkuram interesentam ir vareiba dasasaceit nūmetnei da 3. juļa, syutūt dasacejumu iz e-postu satori@satori.lv, tematā nūruodūt “Pieteikums vasaras nometnei”. Dasacejumā juoīkļaun sovs izvālātais vierzīņs (proza, dzeja voi esejistika); treis teikumūs juoaproksta kaida sova apsiesteiba; juodavīnoj eisa motivacejis viestule, kurā paskaidruots ar kaidu mierki autors gryb pīsadaleit rodūšajā nūmetnē; autorim, kuri da šam nav publicejušīs “Satori”, dasacejumam juodavīnoj eiss asūšuos pīredzis izkluosts i rokstu dorbs izvālātajā žanrā. Taipoš, īsyutūt dasacejumu, ir juoapstyprynoj, ka autoram byus vareiba pīsadaleit vysuos nūmetnis dīnuos. Dalinīku atlasi veiks meistarklašu vadeituoji kūpā ar “Satori” redakceju. Rezultati tiks paziņuoti 10. julī.