“Čyusku kuozys” – Arņa Slobožanina i Daniela Travisa sasatikšona muzykā piec 18 godu

“Čyusku kuozys” – Arņa Slobožanina i Daniela Travisa sasatikšona muzykā piec 18 godu

Rokstu sagataveja: portals lakuga.lv

Kas kūpeigs Bristolei, Buozovai i Sipo? Atrast atbiļdi iz itū vaicuojumu juņa beiguos Latgolā raudzeja Daniels Traviss, Arņs Slobožanins, Amanda Lapa, Mārcis Lipskis i Laura Svikša, rodūt i īrokstūt dzīsmi “Snake Wedding” (“Čyusku kuozys”), informej dzīsmis autori.

2004. godā Arņs i Daniels īpasazyna kaidā studentu balleitē Anglejis piļsātā Bristolē, kur obeji studēja Rītumanglejis Universitatē. Puiši spielēja gitaru i raksteja dzīsmis. Izaruodeja, ka obejim vēļ ir kas kūpeigs – Arņs ir latgalīts, bet Daniels puorstuov aptyvai 5% lelū Suomejis zvīdru minoritatis kūpīnu. 2005. godā Arņs atsagrīze Latvejā i obeju muziku celi škeiruos. Laiku pa laikam jī sasazynuoja i vīns ūtram syuteja sovys dzīsmis. Piec 18 godu puortraukuma beidzūt obeji sasatyka – Daniels devēs aptyvai 500 kilometru garajā ceļā nu Sipo piļsātys Suomejā, kab nūsvieteitu Juoņa dīnu Ludzys nūvoda Buozovā i kūpā radeitu dzīsmi.

Buozovā Juoņa dīnu svieteja ari jaunuo dzīduotuoja i komponiste, Juoņa Ivanova Rēzeknis Muzykys vydsškolys audziekne Laura Svikša, grupys “Piparmētra” dalineica i bundzineica Amanda Lapa, Daugovpiļs Stanislava Broka Muzykys vydsškolys školuotuojs, trompetists Ojārs Tūmiņš i postfolklorys grupys “Rikši” basgitarists Mārcis Lipskis. Piec diveju dīnu rodūša dorba tyka īraksteita dzīsme “Snake Wedding” (“Čyusku kuozys”) angļu i latgalīšu volūdā.

Dzīsmis muzykys autors ir Daniels Traviss, vuordu – Daniels Traviss i Arņs Slobožanins. Īrokstā pīsadaleja Laura Svikša (bolss), Mārcis Lipskis (bass), Amanda Lapa (bungys), Arņs Slobožanins (bolss), Daniels Traviss (gitara, bolss) i Ojārs Tūmiņš (bolss), jī vysi ari aranžejis autori. Miksēja i māsterēja Armands Treilihs. Dzīsmis vizualū nūformiejumu radeja Amanda Lapa.

Print Friendly, PDF & Email

Kalenders

Apr
15
Pyr
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 15 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
Apr
16
Ūtr
12:00 Izruode “Spreideits” @ Daugovpiļs teatris
Izruode “Spreideits” @ Daugovpiļs teatris
Apr 16 @ 12:00 – 13:00
Pyrmū reizi nu teatra skotuvis puosoku luga „Sprīdītis” izskanēs latgaliski! Izruode ir paradzāta kai tim, kurim latgalīšu volūda ir dzymtuo, tai tim, kurim gribīs tū lobuok īpazeit, jo Spreideiša laimis mekliejumi ir labi zynomi i[...]