Izdūts dokumentu kruojums par Latgolys atbreivuošonys ceiņom Naatkareibys karā

Izdūts dokumentu kruojums par Latgolys atbreivuošonys ceiņom Naatkareibys karā

Rokstu sagataveja: portals lakuga.lv

Latvejis Nacionalais arhivs (LNA) izdevs serejis “Vēstures avoti” 10. siejuma nūslādzūšū daļu “Cīņa par brīvību: Latvijas Neatkarības karš (1918–1920) Latvijas Valsts vēstures arhīva dokumentos. 4. daļa: 1919. gada decembra sākums – 1920. gada rudens”, viestej arhiva publiski izplateituo informaceja. Vīna nu ituo laika pūsma nūzeimeiguokūs nūtikšonu ir taišni Latgolys atbreivuošonys ceinis.

Izdavumā publicāti 228 dokumenti, i tī snādz īskotu militarajuos i politiskajuos nūtikšonuos Naatkareibys kara pādejā pūsmā – laika periodā nu 1919. gods decembra suoku leidz 1920. gods rudiņam. Itymā periodā, kas aizasuoce ar laiku piec Bermonta karaspāka sakuovis, nūtyka Latgolys operaceja, kuruos laikā Latvejis armeja sadarbeibā ar Pūlejis armeju atbreivuoja Latvejis austrumu daļu nu ībrukušuos Padūmu Krīvejis Sorkonuos armejis. Latvejis Naatkareibys kars oficiali beidzēs ar mīra leiguma paraksteišonu storp Latveju i Padūmu Krīveju 1920. gods 11. augustā, tok rūbežvaicuojumu atrysynuošona nūsaslēdze piečuok, tuo poša gods rudinī.

LNA Latvejis Vaļsts viesturis arhivs (LVVA) globoj apjūmeiguokū dokumentarūs līceibu kluostu par Naatkareibys karu. Leluokuo daļa itūs materialu īprīšk nav publicāta. Dokumentu kruojumu veidoj divejis olūtu grupys. Apjūmeiguokuo dokumentu daļa atspīgeļoj viesturiskūs i militarūs nūtikšonu gaitu, tim sekoj nūtikšonuos īsaisteitūs personu atminis i puorskoti. Dokumentu kruojuma sastateituojs i zynuotnyskuo īvoda autors ir Latvejis Universitatis Viesturis i filozofejis fakultatis profesors i Latvejis Nacionaluo arhiva vodūšais pietnīks Dr. hist. Ēriks Jēkabsons.

Pīcu godu garumā Dr. hist. Jānis Šiliņš i Ēriks Jēkabsons pieteja, atlaseja i komentēja materialus par Naatkareibys karu, saistūt tū ar Latvejis symtgadi i vajadzeibu aktualizēt i pīminēt itū izškirūšū šaļti myusu zemis viesturē. Rezultatā topuši četri dokumentu kruojumi. Pyrmuo daļa beja veļteita Latvejis bruņuotūs spāku izveiduošonys laikam i Padūmu Krīvejis Sorkonuos armejis ībrukumam. Ūtrei daļa viesteja par vaļsts apvārsumu Līpuojā 1919. gods aprelī, Andrieva Niedrys vaļdeibys veiduošonu i Cāsu kaujom 1919. gods junī, bet trešuo daļa – par vīnuotu Latvejis armejis izveiduošonu, vaļsts īstuožu darbeibys atjaunuošonu, kaujom Latgolā i Pāvela Bermonta karaspāka uzbrukumu Reigai.

Izdavuma beiguos pīduovuota eisa i koncentrāta nūtikšonu hronika par 4. daļā apsavārtū periodu. Dalykumā īkļauts personu ruodeituojs, vītu ruodeituojs 1.–4. daļai i dokumentu publikacejuos izmontuotūs LVVA fondu ruodeituojs 1.–4. daļai. Dokumentu kruojums papyldynuots ar vizualū materialu – fotografejom, dokumentim, kartem. Gruomota ir veļtejums Latvejis karaveirim i civilīdzeivuotuojim, kuri atdeve sovu dzeiveibu par breiveibu Naatkareibys kara laikā.

Izdevumu cikom kas var nūpierkt LNA Latvejis Vaļsts viesturis arhivā Slūkys īlā 16, 1. stuovā pi kasis voi sasazynojūt ar arhivu (latvijas.arhivi@arhivi.gov.lv; 29627830).

Print Friendly, PDF & Email

Kalenders

May
25
Sai
19:00 Grupys “Raxtu Raxti” i “Sinfonie... @ koncertzāle "Lielais Dzintars"
Grupys “Raxtu Raxti” i “Sinfonie... @ koncertzāle "Lielais Dzintars"
May 25 @ 19:00 – 21:00
Līpuojis koncertzālis pavasara sezonys nūslāgumā iz leluos skotivis varēs pīdzeivuot eipašu mageju, kū veiduos mejīdarbeiba tautys i akademiskuos muzykys vydā – grupa “Raxtu Raxti” i kamerorkestris “Sinfonietta Rīga” dirigenta Normunda Šnē vadeibā. Kūpeigajā koncertprogramā skanēs[...]
19:00 Leluo Latgolys zaļumballe @ Lūznovys muiža
Leluo Latgolys zaļumballe @ Lūznovys muiža
May 25 @ 19:00 – 23:00
Zaļumballi īskandynuos grupa “TRIO Rāzna +”, bet vokora ūtrajā daļā apmaklātuojus energiski i skaneigi izklaidēs grupa “Stradivari”.   Īīšonys moksa 4,00 eiro.   Biletis “Biļešu paradīzes” kasēs i Lūznovys muižā.