Rokstu sagataveja: portals lakuga.lv

Jau divdasmytū reizi Rogovka vysus aicynuoja iz Pīterdīnu – tei ir namaineiga nautrānīšu tradiceja 29. junī gūdynuot dzejnīku Pīteri Jurciņu (1932–2004) i vysus pogosta Pīterus, informej Rēzeknis nūvoda Nautrānu apvīneibys kulturys pasuokumu organizatoru vadeituoja Inga Vigule. Pasuokumā itūgod beja jūki, muzyka, daņči i tradicionaluo latgaliski rokstūšūs literatu konkursa apbolvuošona.

Svātki suocēs ar pīminis breidi Desetnīku kopūs, kur Dekteru amaterteatra režisore Ērika Bozoviča beja sagatavejuse Pītera Jurceņa dzejis lasejumus. Tam sekuoja svineibys Nautrānu sporta hallē – KN. Jau trešū godu Pīterdīnys koncerta pyrmuo dzīsme beja “Ar Reigys morāli”, kurys vuordu autors ir Pīters Jurciņš, bet muzykys – Sovvaļnīks aba Ingars Gusāns.

Koncerta suokumā tyka gūdynuoti tī nautrānīši, kuri pīsadaleja akcejā “Rūtoj Rogovkā!”, kur vajadzēja sataiseit Juoņa zuoļu puškeiti voi nūveit vaiņuku, īkuort vīnā nu Rogovkys zuordu, nūsabiļdēt i atsyuteit foto organizatorim. Kai īrosts, Pīterdīnā ar ūzula lopu vaiņukim gūdynuoti tyka ari Pīteri.

Koncertā uzastuoja arī Vinsents Kūkuojs, kurs izpiļdeja dzīsmi “Bryute” (V. Kūkuojs/P. Jurciņš), kas īvadeja vysus iz humora notys, kuru ar vysaidom peršom i pastuostim turpynuoja Cybuļu Jurs, Krapacu Ļuce i Krakopu Zintis. Jī pastuosteja ari par jaunū gruomotu “Groznuo kuorta” i cytom.

Literatu konkursa nūslāgumā tyka gūdynuoti kai laureati, tai izsaceitys pateiceibys par daleibu. Pateiceibys sajēme Veneranda Rimša i Rykovys jaunūs literatu kūpys “Dzejas garša” daleibnīki: Diāna Dimzule, Dace Vilcāne, Vasīlijs Krasnovs, Samanta Strogonova, Ketlīna Dukšta, Inga Strogonova, Dainuvīte Garjonova (vadeituoja Iveta Dimzule).

Veicynuošonys bolvu nominacejā “Proza” sajēme Lilija Limane. Nominacejā “Bārnu literatura” golvonū bolvu sajēme Ilze Vovka. Nominacejā “Dzeja” golvonuo bolva tyka Ingai Kaļvai-Mininai, bet veicynuošonys bolvys – Marutai Avramčenko i Aijai Mikelei-Strušelei. Sovpus Arvīds Gļauda sajēme veicynuošonys bolvu par nūvāruotū izaugsmi dzejis raksteišonā. Itūgod literatu konkursa žurejis komisejā dorbuojuos Veronika Dundure, Anna Rancāne i Laura Melne.

Turpynuojumā pasuokuma apmaklātuojim beja vareiba pasaklauseit i padzīduot leidza folklorys kūpys “Upīte” dzīsmem. Piec dzīšmu koncerta suocēs ari daņču daļa.

Pasuokums nūtyka ar Vaļsts kulturkapitala fonda mierkprogramys “Latvīšu viesturiskūs zemu atteisteibys programa” atbaļsteituos Latgolys kulturys programys finansialu atbolstu.

Galerejā: Pīterdīna Rogovkā. Foto: Marta Zvejsalniece