Bolvu nūvodā atkluots storptautyskais gleznīceibys pleners “Valdis Bušs 2023”

Bolvu nūvodā atkluots storptautyskais gleznīceibys pleners “Valdis Bušs 2023”

Rokstu sagataveja: portals lakuga.lv

11. julī Bolvu nūvodā atkluots 7. storptautyskais gleznīceibys pleners “Valdis Bušs 2023”, informej tuo organizatoru puorstuove Vineta Zeltkalne. Itūgod plenerā pīsadola seši muokslinīki nu Latvejis, cytu Eiropys vaļstu, Dīnavydamerikys i Azejis.

Plenera dalinīku vydā itūgod ir Mahamuduls Hasans (Bangladeša), Daiga Krūze (Latveja), Natālija Borkovska (Pūleja), Letīcija Balci (Argentina/Norvegeja), Juoņs Plivda (Latveja) i Arvidas Martinaitis (Leitova). Pyrmū reizi plenerā teik puorstuovāta Dīnavydamerika, jo Letīcijis dzimtine ir Argentina. Ari Hasans nu Bangladešys ir pyrmais plenera daleibnīks nu Azejis, jis pyrmū reizi ir na tik Latvejā, bet ari Eiropā.

Pyrmajuos plenera dīnuos muokslinīki īpazyna Bolvu nūvoda ainavyskuokuos vītys, kab giutu īdvasmu dobā sovim tūpūšajim muokslys dorbim. Muokslinīkus ir uzrunuojuse daudzveideigūs zaļūs tūņu pīpiļdeituo Latvejis doba, kruosainuos i kūšuos pučis, gleznainī Bolvu i Viļakys azari, gaišī vokori i skaistī saulis rīti. Napylnu diveju nedeļu laikā kotrys muokslinīks izgleznuos vysmoz divejis gleznys, kuruos byus radzamys Bolvu nūvoda, Viļakys apleicīnis ainovys. Tuos tiks duovuotys Bolvu nūvoda pošvaļdeibai, kab papyldynuotu Valda Buša sātys muokslys kolekceju.

Plenera kuratori jau septeitū godu ir muokslinīki Māris Čačka i Elita Teilāne. Tuo eistynuošonu ir atbaļstejuse Latgolys kulturys programa, leidzfinansiejumu nūdrūsynoj Bolvu nūvoda pošvaļdeiba. Plenera daleibnīku atlasi organizej tuo organizatoru sadarbeibys partners Daugovpiļs Marka Rotko muokslys centrs. Plenera laikā radeitūs dorbu izstuodi atkluos 20. julī 17.00 stuņdēs Viļakys nūvoda muzeja izstuožu zālē (Klūstera īlā 1, Viļakā).

Plenera organiziešona i tuo izstuodis izveiduošona ir apsazynuošona, ka muokslinīka Valda Buša (1924-2014) atstuotais montuojums ir nūzeimeigs Latvejis i pasauļa mārūgā. Taišni Viļakys pusē – Susaju pogosta Puokšovā ir suocīs izcyluo latvīšu ainavu meistara Valda Buša dzeivis ceļš.

Print Friendly, PDF & Email

Kalenders

May
25
Sai
19:00 Grupys “Raxtu Raxti” i “Sinfonie... @ koncertzāle "Lielais Dzintars"
Grupys “Raxtu Raxti” i “Sinfonie... @ koncertzāle "Lielais Dzintars"
May 25 @ 19:00 – 21:00
Līpuojis koncertzālis pavasara sezonys nūslāgumā iz leluos skotivis varēs pīdzeivuot eipašu mageju, kū veiduos mejīdarbeiba tautys i akademiskuos muzykys vydā – grupa “Raxtu Raxti” i kamerorkestris “Sinfonietta Rīga” dirigenta Normunda Šnē vadeibā. Kūpeigajā koncertprogramā skanēs[...]
19:00 Leluo Latgolys zaļumballe @ Lūznovys muiža
Leluo Latgolys zaļumballe @ Lūznovys muiža
May 25 @ 19:00 – 23:00
Zaļumballi īskandynuos grupa “TRIO Rāzna +”, bet vokora ūtrajā daļā apmaklātuojus energiski i skaneigi izklaidēs grupa “Stradivari”.   Īīšonys moksa 4,00 eiro.   Biletis “Biļešu paradīzes” kasēs i Lūznovys muižā.