Rokstu sagataveja: portals lakuga.lv

29. septembrī 19 stuņdēs Latgolys viestnīceibā “Gors” nūtiks koncerts par gūdu Latgolys rūžeņai – Aijai Rimšai. Koč ari Aijis Rimšys myusu vydā nav jau ilguoku laiku, juos dzīsmis turpynoj dzeivuot i skanēt. Desmit muzykalajūs godūs – deveni albumi, taidu plotu montuojumu Aija atstuojuse Latgolys muzykai, viestej koncerta organizatoru publicātuo informaceja.

Aija Rimša – vīnkuorša meitine ar plotu sirdi i muzikis dvēseli. Dzīsmis jai topa dabiski i vīgli, vuordi poši par sevi sasakuortuoja ailēs. Aija dzymuse 1967. godā, juos tāvs beja tys, kurs meitai īvuiceja spielēt akordeonu, tok pi sovu personeiguo muzykys instrumentu Aija tykuse pīcu godu vacumā. Aijis Rimšys nailguo myuža laikā ir īskaņuoti deveni soloalbumi, tūs vydā ari septenis Aijis orginaldzīšmu programys, taipoš ari divi latgalīšu tautysdzīšmu apkūpuojumi, tai par Aiju roksta pasuokuma organizatori. Koncerts “Zem citām debesīm” Aijis pīmiņai nūtiks 29. septembrī Latgolys viestnīceibā “Gors”.

Kai stuosta pasuokuma organizatoru “Art Managment Group” puorstuovs Sandis Mohovikovs, ideja par taida koncerta izveidi rodusēs Juram Ostrovskim, kurs ari pats sasazynuojs ar niulejim organizatorim i devs pyrmū impulsu koncerta reikuošonai. “Cīši nūviertejam Aijis talantu i juos personeibu, deļtam ir lels pagūdynuojums reikuot itū pasuokumu. Lela i rodūša tehniskuo komanda struodoj pi tuo, kab itys koncerts byutu eistyn eipašs,” tai Sandis Mohovikovs.

Koncertā sasatiks Aijis radinīki, draugi, laikabīdri, kab atguodynuot plotuokai sabīdreibai par talanteiguos muzikis dzeivi i davumu Latgolys muzykai. Koncertā pīsadaleis: Santa Kasparsone, Ēriks Gruzniņš, Raitis Treijs (“Zeļļi”), Normunds Liepiņš, Juris Ostrovskis (“Patrioti.lg”), Gints Ločmelis (“Ginc un Es”), Andris Šīrants (“Vēja runa”), Gita Dukaļska (“Starpbrīdis”), grupa “Bruģis”, “Dricānu dominante” i cyti gosti.

Beletus iz koncertu var nūpierkt ITE.