Rokstu sagataveja: portals lakuga.lv

28. julī 21.00 stuņdēs Raiņa muzejs “Jasmuiža” aicynoj svieteit vosoru eistynā večerinkā ar kapelu “Bumburneicys” muzeja breivdobys teritorejā, informej muzeja puorstuove Solvita Kleinarte.

Raiņa muzejā “Jasmuiža” itei sezona ir veļteita latgalīšu kuozu tradiceju izzynuošonai, īsaistūt ari apmaklātuojus vysaidūs tematiskūs pasuokumūs. Vysu sezonu muzejā ir apsaverama izstuode “Kuozys”, kurai īdviesme ir dabuota Raiņa dorbūs. Nazkod tūpūšais dzejnīks Rainis, tūlaik students Jānis Pliekšāns, studeju godu breivdīnys pavodūt Juosmuižā, eipaši interesiejīs par latgalīšu kuozom, tūs tradicejom i ritualim. Jis pīrakstejs kuozu i apdzīduošonys dzīsmis nu vītejūs teicieju, kai ari sarakstejs apceriejumu par Vyšku pogosta kuozu īražom, kur apraksteiti rituali, tradicejis, izdareibys latgalīšu kuozuos 19. godu symta 80. godūs. Sovā apceriejumā “Daugavpils apriņķa Višķu pagasta kāzu ierašas” Jānis Pliekšāns roksta, ka parosti jaunī cylvāki preceibu godūs īpasazeist večerinkuos.

“Kab turpynuotu atdzeivynuot na tik kuozu tradicejis, tok ari tū, kai seņuok da kuozu vyspuor ir tykts, muzejs aicynoj iz večerinku. Tei beja komunikacejis i izklaidis forma, jautrs sareikuojums, eipaši jaunīšu vydā gaideita nūtikšona, kur nedeļgolūs puormaiņus pi vīna voi ūtra sābra puļcejuos apleicejūs solu jaunīši. Gūda vīta večerinkā vysod tyka atvālāta muzykantam, kurs spielēja jautrus daņčus,” stuosta muzeja vadeituoja Solvita Kleinarte.

Juosmuižā kapelys “Bumburneicys” atraktivuos muzikis aicynuos sevkuru īsajust 19. godu symta beigu atmosferā, izadoncojūt eistynā lauku večerinkā – zaļumballē.

Projekts teik realizāts ar Vaļsts kulturkapitala fonda mierkprogramys “Latviešu vēsturisko zemju attīstības programma” finansialu paleigu.