Juram Ostrovskam jauna dzīsme i videoklips – “Vokors kluss”

Juram Ostrovskam jauna dzīsme i videoklips – “Vokors kluss”

Rokstu sagataveja: portals lakuga.lv

Struodojūt pi ūtruo autordzīšmu izlasis albuma, Latgolā labi zynomais muzykants Jurs Ostrovskis radejs dzīsmi “Vokors kluss”, kam ari uzfiļmāts videoklips.

Dzīsmis teksta autors ir Jurs Ostrovskis, izmontuota tradicionaluo melodeja. Par dzīsmis īrokstu guoduoja Einārs Lipskis i Kaspars Maks, videoklipa režisors i operators ir Pēteris Muižnieks. Video radzamais kruošņais lavandu lauks “Lavandrūtas” atsarūn Rēzeknis nūvoda Nautrānu pogosta Dekteru pusē. Ostrovskis izsoka pateiceibu tuo saimineicai Aijai Rancānei par vareibu tī rodūši izapaust.

Piec pīdzeivuotuos debejis kai solomuokslinīkam aptaujā “Latvijas sirdsdziesma” ar dzīsmi “Vacuoku sāta”, kas tyka leidz pat lelajam goda finalam, Jurs Ostrovskis aktivuok dasagivs dorbam pi ūtruo autordzīšmu izlasis albuma. Saraksteitys vairuokys jaunys dzīsmis, tymā skaitā ari tikū izlaistuo “Vokors kluss”. Albums varātu tikt pi klauseituoju cyta gods rudinī.

Itei vosora, kai īrosts, Juram ir pasuokumim boguots laiks. Jis sūlej, ka vysūs gaidomajūs koncertūs varēs dzierdēt ari dzīsmi “Vokors kluss”. Sovpus ituo gods 21. oktobrī paradzāta eipaša nūtikšona – grupys “Patrioti.lg” 15 godu jubilejis koncerts Latgolys viestnīceibā “Gors”, kur izskanēs kai muzykaluos apvīneibys leluokī hiti, tai tuos daleibnīku Jura Ostrovska i Artūra Uškāna autordzīsmis nu cytu projektu repertuara. Taipat Jurs ir idejis autors ari Latgolys rūženis – Aijis Rimšys – pīminis koncertam, kas septembra beiguos ari nūtiks “Gorā”. Tī vysi beleti jau dreiži byus izpuordūti, partū teik dūmuots par papyldkoncertu.

Print Friendly, PDF & Email

Kalenders

Apr
19
Pīk
19:00 Grupys “Galaktika” albuma prezen... @ Ludzys tautys noms
Grupys “Galaktika” albuma prezen... @ Ludzys tautys noms
Apr 19 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]