Apvīneiba “Naktenīks un Reiti” muzykā dora viņ tū, kū grib

Apvīneiba “Naktenīks un Reiti” muzykā dora viņ tū, kū grib

Rokstu sagataveja: portals lakuga.lv

Sovulaik seve dasaceišona ar dzīsmi “Duovynoju tev”, juņa vydā izdūts digitalais mini albums (EP), niu prīškā diveji koncerti Rekovā i Bolvūs – itys ir stuosts par nūslāpumainū apvīneibu “Naktenīks un Reiti”.

Juņa vydā “Naktenīks un Reiti” izdeve mini albumu “Audziks”, kurā vydā ir sešys dzīsmis. Kod uzrunuojom apvīneibys puorstuovi izzynuot vaira informacejis, jis atsaceja, voi portals zyna, ka tūs vydā ari taidys ar stypruokim vuordim i byusim gotovi itū publicēt. Iz vaicuojumu, deļkuo dzīsmēs ir vajadzeiba piec taidu, apvīneibys puorstuovs nūsmej, ka šaļtim, aprokstūt koč kū ar lomu vuordim, var pastyprynuot kaidys darbeibys voi lītys nūzeimi. “Šaļtim tys vīnkuorši ir vajadzeigs. Uorzemnīkim jau tai ir dzīsmis, kur gondreiž kotrys treišais vuords ir taids stypruoks. Juosuoc pīradynuot ļauds pi tuo, ka iz prīšku var byut vēļ trokuok,” nūsmej “Naktenīks un Reiti” runysveirs.

Kas tod ir “Naktenīks un Reiti”? Var nūjaust, ka tei ir grupai “Unknown Artist” i īrokstu studejai “Bigmaar’s Records” pītyvynuota apvīneiba, kas muzykā dora tū, kū grib, i tod, kod grib, bet kai poši stuosta, tod tuos rasšonuos sovulaik nūtykuse vīnkuorši aiz bezkauneibys i tuos šaļts vuojuma, kod iz puors stuņžu naasūt bejs daīmams škārsteiklys, tok dators bejs.

Kod izguoja dzīsme “Duovynoju tev”, tyka stuosteits, ka grupys izpiļdeituoju sastuovs ir maineigs. Vys tik festivalā “π-dzīdam” Upītē iz skotivis beja treis, kurūs var atpazeit leidzeibys ar grupys “Unknown Artist” dalinīkim. Tok iz tū “Naktenīks un Reiti” atsoka, gribūt saglobuot nūslāpumaineibu, ka cikom kas tei ir bejuse viņ vīna reize i pi tuo pīcūs nu reita, deļtuo pyrmais īspaids na vysod paruodūt tū, kas tod ir eistineibā. Vys tik jau cīši dreiži – kai eipašajim gostim grupys “Unknown Artist” ballē Rekovā 28. julī i festivalā “Automuzons” Bolvūs – apvīneibai byus vareiba vēļ byut iz skotivis i nūtikšonu apmaklātuojim pošim redzēt, kas tod aiz “Naktenīks un Reiti” globojās.

Karteņā: “Naktenīks un Reiti” festivalā “π-dzīdam”, publicitatis biļde

Nu molys, nūsaklausūt mini albumu “Audziks”, ruodīs, ka apvīneibys muzykā ir vyss – reps, pops, nazkas šlagerisks, deju muzyka i cyti žanri, iz kū apvīneiba atsoka apstyprynūši: “Kotru reizi izavielejam mauduotīs cytā muorkā. Ar mums ir kai ar bitem – nikuo navar zynuot!” Par dzīšmu saturu i stuostu “Naktenīks un Reiti” soka, ka tī vīnkuorši ir stuosti ar izdūmuotim scenarejim par realu kasdīnu, deļtuo jim ruodīs, ka klauseituojim dzīsmis varātu byut vīgli iztveramys i skaidri saprūtamys. Par īdviesmis mekliešonu jī nūsmej: “Mūzu gaida vuojī, bet mes pi juos īmam poši! I albumā ir dzierdams, kod pi juos asam bejuši tyvuok, kod tuoļuok, bet taipat na tuoļuok par vīnu metru!”

EP tituldzīsmē “Audziks” skaņ vuordi “Kaifoju, na tāloju”, i iz vaicuojumu, voi tys ir ari par pošys apvīneibys darbeibu, “Naktenīks un Reiti” atsoka apstyprynūši: “Absoluti! Mes doram tū, kū gribim. Gribiejom izdūt EP, izdevem EP. Kod gribēsim albumu, byus tys. Naceriejom, ka mieneša laikā nu 40 klauseituoju platformā “Spotify” izlēksim da 500! Paļdis vysim, kuri kaifoj i natāloj kūpā ar mums!”

Print Friendly, PDF & Email

Kalenders

Apr
18
Cat
12:00 Latgolys dīna @ Vacsalīnys muižys piļs
Latgolys dīna @ Vacsalīnys muižys piļs
Apr 18 @ 12:00 – 14:00
Latgolys dīna @ Vacsalīnys muižys piļs
19:00 Grupys “Galaktika” albuma prezen... @ Aizkrauklis kulturys centrs
Grupys “Galaktika” albuma prezen... @ Aizkrauklis kulturys centrs
Apr 18 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]