Rokstu sagataveja: portals lakuga.lv

26. augustā 19 stuņdēs Rēzeknis nūvoda Nautrānu pogosta Dekteru cīmā gaidoma Dekteru amaterteatra pyrmizruode komedejai “Onton, mums juosaškir!” Sovpus piec izruodis paradzāta zaļumballe ar grupu “Azars”.

Kai stuosta amaterteatra režisore Ērika Bozoviča, Dekteru cīma amaterteatris pastuov jau aptyvai ostoņus godus. Pa itū laiku ir radeitys četrys leluos izruodis, kur kotra ir apmāram stuņdi gara, i daudz eisuoku skeču. Ar tim teatris jau plaši apceļuojs lelu daļu Latgolys. Poša Ērika īt nu Rēzeknis nūvoda Gaigalovys pogosta, kur 20 godu garumā vadeja Gaigalovys pogosta amaterteatri “Bykovīši”. “Kod ar veiru suoču dzeivuot Dekterūs, jis laikam saprota, ka maņ pa vokorim nazkuo datryukst i pīduovuoja ari Dekterūs paraudzeit sapulcynuot cylvākus i izveiduot sovu amaterteatri,” stuosta Ērika Bozoviča. Jei ari paskaidroj, ka Dekterūs 90. godūs jau ir bejs sovs teatris, kurs kaidā šaļtī puortraucs darbeibu, tok, veidojūt jaunuo amaterteatra sastuovu, beja vareiba pīaicynuot tuo laika teatra akterus, kuri lobu pruotu atsasauce i beja gotovi īsasaisteit jaunuos izruodēs.

Itūgod, 26. augustā, 19 stuņdēs gaidoma Elzys Ilmeris 1958. goda lugys “Anton, mums jāšķiras” latgaliski puorlyktuo izruode. Lugys izviele ari nav najauša. Kai stuosta režisore Ērika Bozoviča, juos tāvs, kurs niu jau nūguojs myužeibā, 60. godūs ir spieļuojs tamā pošā izruodē, deļtam ir rodusēs ideja, ka varātu itū izruodi otkon īstudēt. “Onton, mums juosaškir” ir komedeja par skrauci (skrūderi) ar augstim mierkim. Tī sasavej mīleiba, sapyni, viļšonuos i dziļuoka dūma, ka ar pyulem i leluoku dorbu var panuokt daudz kū. Kai stuosta režisore, originalizruodē latvyski juos tāvs ir spieļuojs Druošsirdi, cikom latgaliskajā versejā byus Maigūņs.

Dekterūs augustā vysod ir cīma svātki, i amaterteatra pyrmizruode ir palykuse kai svātku tradiceja. Parosti iz svātkim saīt lels ļaužu skaits, i ari itūreiz teik gaideits sevkurs interesents. Īīšona ir bez moksys.