Rokstu sagataveja: portals lakuga.lv

Piec mieneša, 23. septembrī, pyrmū reizi tiks sveiteita Eiropys Folklorys dīna, kurys nūtikšonā ar aktivitatem latgaliski aicynoj īsasaisteit ari Latgolys tradicionalūs muokslu – muzyka, doncuošona, stuostnīceiba – puorstuovus, portalu informej kulturys menedžments “Lauska”.

Eiropys Folklorys dīna 2023 ir pilotprojekts, kura rūsynuotuoji i koordinātuoji ir ir Eiropys folkmuzykys teikluojuma – European Folk Network (EFN) – bīdri, tū leidzfinaņsej Eiropys Savīneibys MusicAIRE programa. Ideja ir iz prīšku padareit Eiropys Folklorys dīnu kai regularu, kasgadeju nūtikšonu. Eiropys Folklorys dīnys iniciativa ir taišni saisteita ar vīnu nu EFN mierku: radzami paruodeit, ka vysā Eiropā ir īvārojams cylvāku kūpums, kurs vīnā voi ūtrā veidā ir saisteits ar tradicionalajom muokslom (muzyka, doncuošona, stuostnīceiba).

Kai viestej publiski daīmamuo informaceja, Eiropys Folklorys dīnā var pīsadaleit sevkurs grybātuojs, ansamblis, grupa, instituceja, bīdreiba, kūpīna, darbneica voi lokala apvīneiba – kotrys, kurs grib pīsavīnuot ar kaidu aktivitati, kas ir saisteita ar tradicionalū muzyku, doncuošonu voi stuostnīceibu kai kluotīnis voi attuolynuota pasuokuma veidā. Pīsadaleišonys veidi ari var byut vysaidi – vīnkuoršs videoīroksts ar kaidu seneju voi jaunu dzīsmi, augšynīluodejūt tū socialajūs medejūs i atzeimejūt #europeanfolkday, var reikuot koncertus voi festivalus 23. septembrī voi ap itū datumu, i publikacejuos atzeimejūt tū kai daļu nu Eiropys Folklorys dīnys voi dareit koč kū cytu. Taipat Eiropys Folklorys dīnys nūtikšonuos aicynuoti īsasaisteit medeju puorstuovi, stuostūt par dzīsmem, muokslinīkim, cytom temom, kas saisteitys ar folkloru.

Kab īsasaisteitu Eiropys Folklorys dīnys svieteišonā, sova nūtikšona juoregistrej datubazē i tei tiks dalykta cytim pasuokumim Eiropys kartē. Vaira informacejis ITE.