Rokstu sagataveja: portals lakuga.lv

Pīktdiņ, 8. septembrī, 16.00 stuņdēs Daugovpiļs Marka Rotko muokslys centrā gaidoma rudiņa izstuožu sezonys atkluošona ar vyspasauļa konkursa izstuodis “Martinsona balva 2023” apbolvuošonys ceremoneju i laureatu nūsaukšonu, informej centra puorstuove Inita Paegle.

Ituo gods rudiņa sezonys tūni Rotko centrā, Daugovpiļs cītūksnī, Daugovpilī i cytur Latvejā nūsoka 4. Latvejis Keramikys bienalis programa, muokslinīki i aktualuos tendencis pasauļa laikmeteigajā keramikā.

Rudiņa izstuožu sezonys i 4. Latvejis Keramikys bienalis centraluo nūtikšona ir storptautyskuo konkursa izstuode “Martinsona balva 2023”, kurai itūgod sajimti 685 izcili pīsacejumi nu 71 vaļsti puorstuovūšim muokslinīkim, tymā skaitā 68 pīsacejumi nu Latvejis, kas ir da ituo leluokais skaits bolvys viesturē i puorlīcynūšs aplīcynuojums tuos nūzeimeibai pasauļa mārūgā. Martinsona bolvys kūpejais bolvu fonds (20 000 EUR) tiks sadaleits bronzys, sudobra i zalta gūdolgu sajiemieju vydā nacionalajā i storptautyskajā kategorejā. Vysi eksponātī dorbi tiks īkļauti izstuodis katalogā, bet daleibnīki byus gaideiti vysūs bienalis pasuokumūs.

Vēļ Rotko centra rudiņa izstuožu sezonā tiks atkluota 3. Latvejis Keramikys bienalis konkursa izstuodis “Martinsona balva 2021” zalta gūdolgys sajiemiejis leitovīšu keramikis Agnis Šemberaitis personalizstuode “Baiļu vārdošana”. Tīpat sūpluok byus apsaverama ari “Martinsona balvas 2018” bronzys gūdolgys sajiemieja muokslinīka Kaspara Geiduka pīminis personalizstuode “Elementi”. Agnis Šemberaitis daiļrade ītver napuortrauktu cylvāka dobys izpieti, drūsmeigai interpretejūt puorsoku i zynuotnyskuos fantastikys temys i varūņus, vysaidu kulturu ritualuos praksis, mitiskūs uzskotus i arheologiskūs totemus. Sovpus izstuode “Elementi” aptver kai sociali aktualys i myusdīneigys temys, tai vaicuojumus par kermini, tuo strukturalū izbyuvi i seve apsazynuošu, kai ari instinktivi veiduotus objektus, caur kurim muokslinīks reflektej par dobys formu daudzveideibu, rodūši interpretejūt mikrokosmu, telpu i tuos izbyuvi.

Kluotyn keramikys muokslai rudiņa sezonu Rotko centrā veidoj spūdrs i izteiksmeigs Latvejis laikmeteiguos gleznīceibys puorstuovs – muokslinīks Uldis Čamans – ar izstuodi “Mirkļa piezemēšanās”. Ulda Čamana gleznīceiba bolstuos juteklisku sajiutu mudžekļūs, dinamisku nūtikšonu pretnūstatejumūs. Koč i ir gryuts definēt rakstureiguoku muokslinīka daiļradē, juoizceļ smolkai sabolsuotais, buolais reita spaitojums, kas uzplaiksnej voi sevkurā gleznā.

Rudiņa izstuožu sezonys svineiguo atkluošona 8. septembrī ir tik nalela daļa nu 4. Latvejis Keramikys bienalis pasuokumu programys. Pyrma svineiguos ceremonejis Rotko centrā 14.00 stuņdēs uora stykla galerejā 4METRI Hospitaļa īlā 8 tiks atkluota muokslineicu Elīnys Titānis i Unys Gurys keramikys dubultizstuode “3+4”. Sovpus 15.00 stuņdēs Daugovpiļs cītūkšņa 7. bastiona kazematūs tiks attaiseita laikmeteiguos keramikys kruotive. Martinsona sātā varēs redzēt storptautyskai atzeituo latvīšu keramika, divkuorteja Martinsona bolvys sajiemieja Daiņa Pundura performaņci “Vizualizējot gravitāciju” i nūtiks Pētera Martinsona memorialuo kataloga prezentaceja.

Īīšona pasuokumūs – bez moksys. Rudiņa izstuožu sezona apmaklātuojim byus daīmama da 2023. gods 19. novembra.

Rotko centrā vys vēļ byus apsaverama storptautyskuo keramikys simpozeja izstuode “Ceramic Laboratory”, britu muokslinīka Džona Hoilenda izstuode “Uztveres durvis” i Marka Rotko originaldorbi. Septembra beiguos rudiņa izstuožu sezonu papyldynuos storptautyskuo gleznīceibys simpozeja “Mark Rothko 2023” daleibnīku dorbi.