Rokstu sagataveja: portals lakuga.lv

Nu 7. da 10. septembra Varšavā nūtiks kinu festivals “Myusu pošu vuordim”, kurā izruodeis latgalīšu volūdā uzjimtū kinu “Piļsāta pi upis”. Itys ir Pūlejā pyrmais kinu festivals, kas veļteits pyrmīdzeivuotuoju kulturom i volūdom, i tys nūteik jau ūtrū reizi.

Kinu “Piļsāta pi upis” ruodeis 8. septembrī 18.00 stuņdēs Varšavys kinuteatrī “Luna”. Piec tuos byus diskuseja, kurā pīsadaleis kinys režisors Vīsturs Kairišs, Vineta Vilcāne nu latgalīšu kulturys kusteibys “Volūda” i Oduma Mickeviča Universitatis Poznaņā (Pūleja) profesors, sociolingvists Tomašs Viherkevičs, kura zynuotnyskuos interesis ir saisteitys ar latgalīšu volūdu.

Kai nūruodeits kinu festivala “Myusu pošu vuordim” aprokstā: “Mes svietejam daudzveideibu i paruodom vysaidu kūpīnu kulturu i volūdys. Taipoš pīvieršam viereibu problemom, ar kurom sasaskar pyrmīdzeivuotuoju tautys. Ituo gods treis golvonuos temys ir dekolonizaceja, iudiņs i doba i “mes vys vēļ asam ite”. ”

Festivala laikā nūtiks ari kulturu daudzveideibys vokors, kurā skanēs latgalīšu dzīsmis grupys “Piparmētra” izpiļdejumā.