Latgolys storpkongresā sprīss par Latgolys atteisteibu

Latgolys storpkongresā sprīss par Latgolys atteisteibu

Rokstu sagataveja: portals lakuga.lv

22.–23. septembrī Rēzeknis Tehnologeju akademijā nūtiks Latgolys storpkongress “Latgolys atteisteiba – drūšeibys pamats Latvejai i Eiropai”, kura laikā paneļdiskusejuos sprīss par Latgolys atteisteibys aspektim – drūšeibys vaicuojumim, reprezentacejis aspektim, tymā skaitā, sadarbeibu ar Pūleju turysma atteisteibā, latgalīšu volūdys ilgtspieju i izgleiteibys kvalitati i pīejameibu, informej projekta koordinatore Ilga Šuplinska. Pasuokumā ir aicynuoti daudzi diskuseju daleibnīki nu vaļsts īstuožu, Eiropys Parlamenta, medeju, piļsūniskūs organizaceju, uzjāmumu i izgleiteibys īstuožu.

Latgolys kongresa lāmumu izpiļdis padūmis (LKLIP) prīšksāduotuojs Agris Bitāns nūruoda, ka “pasuokuma mierkis ir turpynuot Latgolys kongresa uzstuodejumu i lāmumus, kai ari izrunuot aktualūs vaicuojumus izgleiteibā, volūdys lītuojumā i drūšeibā. Tei byus vēļ vīna vareiba atguodynuot sabīdreibai i vaļsts institucejom par Latgolys i latgalīšu volūdys interešu napīteikamu īvāruošonu.”

Latgolys storpkongress ir zeimeigs Latgalīšu kulturys bīdreibys (LKB) darbeibys atskaitis punkts, partū ka itamuos septembra dīnuos paīt 30 godu nu šaļts kai LKB ir registrāta darbeibai, rysynojūt i aizstuovūt latgalīšu kulturys, volūdys i ekonomikys vaicuojumus. LKB ir īdybynuojuse Latgolys kongresu tradiceju 1992. godā, dūmojūt par pasaulī asūšūs latgalīšu centīņu apvīnuošonu i 1917. gods kongresa ideju turpynuošonu. Ir cyts laiks, tok daudzi aizdavumi ir leidzeigi tim, kas beja Latgolys latvīšu kongresā Rēzeknē, partū svareiga sevkura daleibnīka īsaiste.

Pasuokuma nūslāgumā byus Nikodema Rancāna Latgolys regiona školuotuoju konkursa ceremoneja, kurā gūdynuos izcyluokūs, rodūšuokūs školuotuojus, kas ryupejās par latgalīšu volūdys, vierteibu saglobuošonu, ir rodūši i psihologiski atbolstūši pyrmsškolys, školys, profesionālajā ci augstuokuos izgleiteibys vidē. Daleiba pasuokumā bez moksys, interesenti aicynuoti registrētīs da 15. septembra, aizpildūt daleibai anketu ITE. Pasuokuma programa apsaverama ITE.

Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
15:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 13 @ 15:00 – 17:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]