Rokstu sagataveja: portals lakuga.lv

Nu 6. septembra da 29. oktobra Raiņa muzejā “Jasmuiža”, Preiļu nūvoda Aizkaļnē, byus apsaverama muokslineicys Agrys Ritinis gleznu izstuode “Apsarmojis dārzs”, informej muzeja puorstuovi.

Izstuodē byus radzamys gleznys, kas radeitys beidzamūs treis godu laikā. Ir gleznys, kas radeitys plenerūs Viļakā, Varakļuonūs, tamuos ar sīvītis skatejumu teik apspālātys zīdu kompozicejis, pīmāram, gleznuos “Augusta miglainie rīti”, “Flokšu pilsēta”, “Puķuzirnis”, “Vasara”. Nūgiutys ari dobys nūskanis vysa gods grīzumā, kuru kompozicejuos autore atsasoka nu līkuo, bet atspīgeļoj tūs varūni, kas ir bejs impulss gleznys radeišonai. Tys radzams gleznuos “Tur plūst pilsēta”, “Žubītes ābelē”, “Apsarmojis dārzs”, kur vārojama realisma i dekorativitatis mejīdarbeiba.

“Pasauļa leluma izjiuta bīži īsasuoc ar īīšonu dobā. Kotru godu kai nu jauna īraugu pavasara zīdiešonu. Kotru reizi prīcojūs par svaigi nūpļautu zuoli i tuos svaigū smuordu, cytu pi cytys kuorteigi sakuortuotom uobuleņa lapeņom. Zīdu buketi kai muokuli īgulst vāzēs. I pavasara, vosorys i rudiņa kruosaineibu nūmaina dobā īsastuojs zīmys grafiskais mīrs,” par īdvesmi dorbim stuosta Agra Ritiņa.

Agra Ritiņa gleznīceibu vuicejusēs Latvejis Muokslys akademejis Latgolys filialē pi pedagoga, gleznuotuoja A. Zelča i Latvejis Muokslys akademejā magistra studejuos pi profesoru K. Zariņa i A. Naumova. Itūšaļt struodoj Rēzeknis Muokslys i dizaina vydsškolā par gleznuošonys i zeimiešonys pasnīdzieju. Nu 2006. gods dorbojās gleznuotuoju apvīneibā V.I.V.A, ar kuru kūpā veiduotys vaira nakai 35 izstuodis. Juos rodūšajā kontā ir ari vaira nakai 25 personalizstuodis, kai ari grupu izstuodis Latvejā, Leitovā, Boltkrīvejā, Suomejā, Vuocejā, Beļgejā, Turcejā. 2020. gods J. Pīguožņa bolvys Latvejis ainovu gleznīceibā laureate.