Izsludynuota Juoņa Gleizda bolva malnboltajā fotografejā

Izsludynuota Juoņa Gleizda bolva malnboltajā fotografejā

Rokstu sagataveja: portals lakuga.lv

Sagaidūt fotomuokslinīka Juoņa Gleizda (1924-2010) symtū jubileju, Rēzeknis nūvoda pošvaļdeiba sadarbeibā ar Latgolys fotografu bīdreibu izsludynoj i organizej fotokonkursu malnboltajā fotografejā “Jāņa Gleizda balva fotogrāfijā 2024”, informej pošvaļdeibys puorstuove Jūlija Jurāne.

Konkurss i tuo golvonuo bolva teik veļteiti Juoņam Gleizdam, nūviertejūt muokslinīka davumu fotomuokslā, ar mierki popularizēt muokslinīka davumu kulturā, kai ari malnboltuos fotografejis jaunradis i atteisteibys veicynuošonai.

Juoņa Gleizda bolva fotografejā, kai ari 1000 EUR naudys bolva tiks pasnāgta i konkursa rezultati tiks paziņuoti Juoņa Gleizda 100. jubilejai veļteitā pasuokumā, kas nūtiks Latgolys viestnīceibā “Gors” 2024. gods 10. majā. Konkursa laureatu dorbi tiks izstuodeiti Juoņam Gleizdam i konkursam veļteituos izstuodēs Latgolys viestnīceibā “Gors” nu 2024. gods 15. apreļa da 15. juņa, kai ari publicāti konkursa i izstuodis katalogā.

Konkurss aptver pīcus dažaidus fotografejis žanrus – portrets, akts, klusuo doba, ainova i sports. Tam īsnāgtuos fotografejis izviertēs eipaši sataiseita komiseja, i konkursā pīsadaleit teik aicynuoti vysi fotografi, nasaverūt iz tūs vacumu, nūsadorbuošonu voi profesionalajom fotografiešonys īmaņom.

Pīsasaceišona da 2024. gods 31. janvara, syutūt fotografejis gleizdam100@rezeknesnovads.lv. Vaira informacejis par konkursa nūsacejumim, pīsasaceišonu, praseibom i dorbu viertiešonu nūlykumā ITE.

Juoņs Gleizds dzims 1924. gods 7. majā Rēzeknis nūvoda Vacgailumūs. Juo rodūšuos gaitys fotografejis nūzarē nūvārtātys kai Latvejis, tai storptautyskā mārūgā, pīsadolūt 800 izstuodēs vysūs pasauļa kontinentūs i sajēmūt 170 medaļu, kausu i Grand Prix bolvu. Muokslinīkam 1979. godā pīškierts Storptautyskuos fotomuokslys federacejis gūda tituls (AFIAP), 1985. godā – LPSR Nūpalnim boguotuo muokslys darbinīka gūda nūsaukums, 1988. godā – Storptautyskuos fotomuokslys federacejis ekselencis tituls (EFIAP). 1989. godā Juoņs Gleizds tyka par Mārtiņa Buclera premejis laureatu. 1995. gods 3. majā Juoņam Gleizdam par padareitū fotomuokslā pīškierts Treju Zvaigžņu ordiņs.

 

Print Friendly, PDF & Email

Kalenders

Jul
18
Cat
14:00 Bolvu nūvoda svātki @ Bolvi
Bolvu nūvoda svātki @ Bolvi
Jul 18 @ 14:00 – Jul 20 @ 23:45
Bolvu nūvoda svātki @ Bolvi
16:00 Storptautyskuos rezidencis nūslā... @ Rotko muzejs
Storptautyskuos rezidencis nūslā... @ Rotko muzejs
Jul 18 @ 16:00 – 17:30
18. julī 16.00 stuņdēs Rotko muzeja konferenču zālē nūtiks storptautyskuos rezidencis nūslāguma izstuodis atkluošona.   Nedelis garumā, nu 12. da 19. juļa Eiropys Savīneibys finansātuo projekta “Eiropas kultūra: Visi dažādi – visi vienlīdzīgi” laikā Rotko[...]