Rokstu sagataveja: portals lakuga.lv

Kluotyn na tik rudiņs i školys laiks, tok ari tradicionaluos Dzejis dīnys. Itūgod tūs programa pīsaceita ar saukli “Dzeja elpoj” i tamā natryukst ari latgalisku nūtikšonu – na tik Latgolā, nu ari Reigā. Portala lakuga.lv izlasē – leluokuos da ituo pīsaceituos nūtikšonys, tok vysom aktualitatem var sekuot leidza ari myusu nūtikšonu kalendara sadaļā.

Pyrmuos dzejis saliduojums i diskuseja par mozajom volūdom Reigā

Jau itūnedeļ Reigā byus vairuokys Dzejis dīnu nūtikšonys, kuruos pīsadaleis ari Anna Rancāne. Reit, 6. septembrī, 17.00 stuņdēs Rakstnīceibys i muzykys muzeja kulturtelpā “Tintnīca” jei byus vīna nu pasuokuma “Ieelpa. Pirmās dzejas saliduojums” daleibnīku. Tī ar stuostim par sovim pyrmajim dzejis kruojumim i dzejis skaitejumim uzastuos ari Ronalds Briedis, Jānis Rokpelnis i Daina Sirmā, bet muzykalu pavadejumu vysa vokora garumā nūdrūsynuos Reinis Jaunais. Pasuokumā pasadaleit ar sovu dzejis pīredzi ir aicynuoti ari tūpūšī dzejnīki.

Sovpus dīnu piečuok, 7. septembrī, 18.00 stuņdēs Latvejis Nacionalajā bibliotekā paradzāta diskuseja par mozūs tautu dzejis i volūdys situaceju, kurā pīsadaleis īru autori Seosams O Murču (Seosamh Ó Murchú), Aine Ui Foglu (Áine Uí Fhoghlú), Mollija Tvomī (Molly Twomey) i latgalīšu dzejneica Anna Rancāne. Diskuseju vadeis līvu volūdnīks i dzejnīks Valts Ernštreits.

Dzejis performaņce

13. septembrī 19.00 stuņdēs Reigā, Tallinys īlys kvartalā, nūtiks dzejis performaņču pasuokums. Julī vīnpadsmit jaunīši – dzejnīki i dzejis interesenti – sasatyka meistardarbneicuos Tallinys īlys kvartalā, kab īpazeitu performaņcis teoretiskuos i praktiskuos izpausmis taišni dzejis aspektā. Augustā mentoru vadeibā ir radeitys septenis dzejis performaņcis, kū tod itymā vokorā varēs pīdzeivuot skateituoji. Latgaliski rokstūšūs autorus pasuokumā puorstuovēs mygluojs.

Rogovkys dzejis voga

Sastdiņ, 9. septembrī, Rēzeknis nūvoda Rogovkā tiks turpynuota pārņ aizsuoktuo Dzejis dīnu nūtikšona – pyrmuo dzejis slama latgaliski dzejnīku saceņseiba “Rogovkys dzejis voga”. Ari itūgod pasuokumā pīsadaleis latgaliski rokstūši dzejis autori, jūs dzejis skaitejumus papyldynuos muzykalys uzastuošonys, kai ari gaidoma muzykys i laikmeteiguos dejis performaņce ar pārnejuo gods uzvarātuojis – Māreitis Slišānis – dzeju. Vaira par pasuokumu var skaiteit ITE.

Sasatikšona ar dzejneicu Dagneju Berkenelē i Mežavydūs

Ituo gods latgalīšu dzejis leluokais jaunums ir dzejneicys Dagnejis debeja kruojums “Ups, kūki i mes”. Naseņ tyvuokūs ļaužu lūkā pīdzeivuota tuo prezentaceja, tok sasatikšona ar skaiteituojim turpynojās na tik gruomotys puslopuos, bet ari bibliotekuos. Dagneju varēs satikt kai Dzejis dīnu pasuokumā Raiņa sātā Berkenelē 8. septembrī, tai Ludzys nūvoda Mežavydu bibliotekā 12. septembrī.

Valentins Lukaševičs i Arņs Slobožanins Ārdavā

Preiļu pusē, Ārdavys bibliotekā, itūnedeļ gaidoma sasatikšona ar divejim labi zynomim Latgolys kulturys i sabīdryskajim darbinīkim – literatu i literaturzynuotnīku Valentinu Lukaševiču, kai ari muziki i viesturnīku Arni Slobožaninu.

Dzejis dīnys Daugovpilī

Daudzveideiga Dzejis dīnu programa īplānuota ari Daugovpilī. Tuos laikā jaunnedeļ Latgolys Centralajā bibliotēkā varēs sasatikt ar divejom latgaliski rokstūšom autorem – 12. septembrī tī gasteis literate Ligija Purinaša, sovpus 14. septembrī – portala lakuga.lv redaktore Laura Melne.