Rokstu sagataveja: portals lakuga.lv

Latgolys Kulturys centra izdevnīceibā izdūts 28. literaturys almanahs “Olūts”, kurā var skaiteit 11 autoru vysaiduoku žanru tekstus latgaliski.

Jaunuokajā “Olūta” izdavumā var puorskaiteit Latgolā labi zynomūs autoru Oskara Seiksta i Voldemāra Vogula jaunuokūs dzejūļus. Stuostu “Napīpiļdeitūs sapynu duorzs” pīduovoj Aija Mikele-Strušele, sovpus ar sovim pandemejis laika pīrokstim pasadola Inga Kaļva-Minina. Kai īrosts, “Olūtā” var puorskaiteit ari Ilzis Keišys miniaturys, Jūlija Truopa, Ernesta Vilcāna i Kristīnis Gļaudys dzejūļus, bet Magdalena Vjatere sūpluok dzejai pīrakstejuse ari nūklauseitys sarunys i dūmu gryudus. Pīters Meikstums stuostā “Vosora Vuorpu cīmā” attāloj jaunīša pīdzeivuojumus vosorā, Reigys dzeivi puormejūt iz Latgolys laukim, tok Arvīds Gļauda raudzejs pīraksteit sova suņa skotu iz dzeivi.

Ituo literaturys almanaha “Olūts” laidīņa sastateituojs i redaktors ir Juoņs Elksnis, bet korektore – Terēze Šarkovska. Iz vuoka – Ilonys Žukovskys uzjimta karteņa. Gruomotys izdūšonu finansiali atbaļstejuse Latgolys kulturys programa 2023, kai ari Juoņs Blaževičs, Andris Gribuška i Olga Vogule.

Literaturys almanaha izdūšona suocēs vuocu okupacejis laikā – 1943. i 1944. godā V. Luoča izdevnīceibā izguoja pyrmī seši “Olūta” numeri. Septeitais numers izguoja jau trymdā – Rītumvuocejā – 1947. godā. Piec Latvejis naatkareibys atgiušonys, suocūt ar 1992. godu, “Olūtu” izdūd Latgolys Kulturys centra izdevnīceiba.