Rokstu sagataveja: portals lakuga.lv

13. septembrī 13.15 stuņdēs Rēzeknis Vaļsts 1. gimnazejā tiks atkluota izstuode “Sūpluok – dzymtu stuosti”, kas izveiduota pusaudžu i jaunīšu nūmetnē “Sūpluok” Latgalīšu kulturys bīdreibys (LKB) projektā “Dzymtu stuosti multikulturalajā Latgolā i latgalīšu volūdā” ar Eiropys Savīneibys MARIO programys atbolstu, informej LKB vadeituoja i projekta koordinatore Ilga Šuplinska.

Pusaudžu i jaunīšu nūmetne “Sūpluok” puļcēja 32 daleibnīkus, kas izdzeivuoja latgaliskuos tradicejis, atteisteja sovys rodūšuos, pietnīcyskuos i komunikacejis prasmis i veiduoja sovu saimu stuostus. Tys ir apkūpuots ceļojūšā izstuodē, kas reit tiks atkluota vīnā nu školu, kurys školāni pīsadalejuši nūmetnē.

Nūmetnis daleibnīki beja nu Rēzeknis, Rogovkys, Kuorsovys, Zylupis, Dekšuoru, Limbažu, tok lela daļa beja ari nu Reigys, kai ari vīna daleibneica – nu Anglejis. Izstuodis ideja ir paruodeit, cik vysaiži var tikt apkūpuoti dzymtu stuosti, pamaneit, cik svareiga ir volūdys i viesturis ītekme dzymtys stuostā, kai ari likt vīnaudžim aizadūmuot par sovu dzymtu i tuos tradicejom.

Izstuodi veidoj nūmetnis daleibnīku stuostejums par sovu dzymtu, kas atsakluoj kai: ilustrātys meiluokuos dzīsmis; volūdu CV, kur var redzēt, ka sevkurā dzymtā runoj vaira par vīnu volūdu; vuorda pieteišonys kartis – ar statistiku i etimologeju, uzvuorda izplateibu; dzymtys spāka logo kaidā latvīšu roksta zeimē i augā, viesturis asociativuo spēle ar sūpluokīšu pīsadaleišonu; kartis, kurā izceļuojom sovus ci sovu rodu migracejis ceļus, vierteibys – atslāga vuordi – dzymtai, saimei, byušonai sūpluok; receptis, kū babeņa pastuosteja i gatavejom ari tagad; pa kaidai lītai ci foto, ka beja vareiba tū atguoduot, kai ari vacuoku viertejumi i atzinis par sovu saimi i identitati.

Izstuode ceļuos pa tom školom, nu kurūs nūmetnē pīsadalejuši daleibnīki leluokā skaitā, tok nūslāgumā tei byus apsaverama Lūznovys muižā, kur sūpluok ar literari muzykalū Andrejdīnu 30. novembrī nūsaslēgs izstuodis ceļuojums.