Latgalīšu muzykys jaunumu izlase i grupa “Pienvedēja piedzīvojumi” – aicynoj festivals “Upītes Uobeļduorzs”
Rokstu sagataveja: portals lakuga.lv
Sastdiņ, 16. septembrī, 18.00 stuņdēs Bolvu nūvodā iz sasatikšonu tikū piec leluos rekonstrokcejis otkon attaiseitajā namaterialuos kulturys montuojuma centrā “Upīte” aicynoj senejuokais latgalīšu festivals – meilys aiļu i dzīšmu festivals “Upītes Uobeļduorzs”. Kai informej festivala reikuotuoji, itūreiz sūpluok latgalīšu muzikim i grupom “Dabasu Durovys”, “Unknown Artist”, Vinsentam Kūkojam, “Gandreiž 10nīkā”, ailinīkim – Annelei Slišānei, Ilzei Spergai, Inetai Atpilei-Juganei, Rasmai Sviklei i daudzim cytim kai eipašī gosti iz skotivis kuops grupa “Pienvedēja piedzīvojumi”.
Jau tradicionali festivalā “Upītes Uobeļduorzs” alinīku uzastuošonys mejās ar muziķu i grupu prīšknasumim. Itūreiz iz skotivis kuops ailinīki Mārīte Slišāne, Arnis Bukšs, Ineta Atpile-Jugane, Annele Slišāne, Ilze Sperga, Līga Slišāne, Gunta Ločmele, Līvija Liepdruviete, Jana Skrivļa-Čevere i Rasma Svikle, bet muziķu vydā byus folklorys kūpa “Upīte”, folklorys kūpa “Ceidari”, projekts “Vuordi”, grupa “Kei-Rei”, dzīduotuoja Santa Savicka-Drozdova, grupa “Unknown Artist”, grupa “Gandreiž 10nīkā”, grupa “Dabasu Durovys”, dzīsminīks Vinsents Kūkojs, grupa “Reibums”, grupa “Fak’n’Turīs” i apvīneiba “Naktenīks i Reiti”. Kotru godu festivala reikuotuoji pasaryupiejuši ari par kaidu eipašū gostu i itūgod tei byus grupa “Pienvedēja piedzīvojumi”, par kuru taišni nedeļu piec festivala Reigā gaidoma dokumentaluos kinys pyrmizruode.
Meilys aiļu i dzīšmu festivals “Upītes Uobeļduorzs” nūteik jau vaira nakai 20 godu, i tys ir vacuokais da ituo nūteikūšais latgalīšu festivals pasaulī. Pasuokuma idejis autors ir latgalīšu literats, nūvodpietnīks Ontons Slišāns, kurš sovulaik īsadūmuoja sataiseit sovpateigu Dzejas dīnom veļteitu festivalu, kab popularizātu i saglobuotu latgalīšu volūdu. Itūšaļt festivala organiziešonu turpynoj Ontona dāls Andris Slišāns ar saimi, saglobojūt festivalu kai kasgadeju sasatikšonas reizi, kurā skaņ latgalīšu volūda.
Festivala reikuotuojs, namaterialuos kulturas montuojuma centra “Upīte” direktors Andris Slišāns, sagaidūt ituo gods festivalu ir prīceigs: “Piec treis godu eksperimenta septembra vydā reikuot “Upītes Uobeļduorzu” uorā, šūgod atsagrīžam atpakaļ atjaunuotajā namaterialuos kulturas montuojuma centra “Upīte” zālē. Festivals kotru godu ir īspieja apsavērt ari jaunumus latgalīšu muzykā i ailēs, deļtuo aicynojam nasabeit i atīt izbaudeit, kas jauns tod pa itū godu ir saradeits!”
Festivala beleti ir nūpārkami platformā bezrindas.lv. Pasuocīņa beletu cena īprīškpuordūšonā 5,99 €, bet festivala nūtikšonys laikā 16. septembrī 9,99 €. Eipaša atlaide daīmama kartis “3+” eipašnīkim – pārkūt beletu iz vītys festivalā, tuo cena 4,99 €. Festivala “Upītes Uobeļduorzs” reikuotuojs ir namaterialuos kulturas montuojuma centrs “Upīte”, bet pasuocīņa nūtikšonu atbolsta Bolvu nūvoda pošvaļdeiba i Vaļsts kulturkapitala fonds, informativi atbolsta latgalīšu kulturys ziņu portals lakuga.lv.
