Oktobrī skanēs rodūšuos apvīneibys “Patrioti.lg” 15 godu jubilejis koncerts

Oktobrī skanēs rodūšuos apvīneibys “Patrioti.lg” 15 godu jubilejis koncerts

Rokstu sagataveja: portals lakuga.lv

21. oktobrī 18 stuņdēs Latgolys viestnīceibā “Gors” Rēzeknē nūtiks Latgolys muziķu Artūra Uškāna i Jura Ostrovska rodūšuos apvīneibys “Patrioti.lg” 15 godu jubilejis koncerts. Par pavadejumu koncertā guoduos muziķu grupa “ArMaestro” Anatolija Livčys vadeibā, koncerta eipašī gosti byus dzīduotuoja Olga Rajecka, veiru kors “Graidi”, akordeonists Valērijs Mukāns i cyti muoklinīki, viestej grupys puorstuovi.

Koncertā skanēs grupys “Patrioti.lg” popularuokuos dzīsmis “Daugaveņa”, “Latgaleite”, “Patrioti”, “Dzeivuot ir labi”, taipoš ari Jura Ostrovska i Artūra Uškāna autordzīsmis nu cytu muzykalūs projektu repertuara. Kai soka Artūrs Uškāns: “Laikā, kod beja latgalīšu muzykys bums, roduos ari “Patrioti.lg”. Tai kai Juram jau beja rodusēs dzīsme “Daugaveņa”, izdūmuojom ījimt patriotiskūs dzīšmu nišu. Tai roduos dzīsme “Patriots”, Dzeiveite”, “Rāzna” i cytys popularys dzīsmis, kurys atsvaidzynuotā skaniejumā varēs dzierdēt “Patrioti.lg” koncertā.”

“Sovulaik “Patrioti.lg” beja cīši populars projekts, kas cylvāku atmiņuos palics ar sovom patriotiskom dzīsmem, kuruos tyka apdzīduotys ari sadzeivyskys temys. Ir paguojuši 15 godi, i niu, 21. oktobrī, mes otkon sasatiksim jubilejis koncertā. Itūšaļt struodojam ari pi jaunu dzīšmu i vysmoz vīna nu tūs skanēs ari gaidomajā koncertā. Es koncertu gaidu ar nalelu satraukumu i eipašom sajiutom, dūmoju, ka tys byus breineigs pasuokums,” pīzeist Jurs Ostrovskis.

Grupa “Patrioti.lg” sovu debeju pīdzeivuoja 2008. godā, kod, pasasokūt publikys atbolstam, tyka dzīšmu konkursa “Latvijas šlāgeraptauja” lelajā goda finalā. Apvīneiba topuse, sasadorbojūt pazeistamim Latgolys muzikim Artūram Uškānam i Juram Ostrovskim. Sovys darbeibys laikā grupa koncertiejuse daudzuos Latvejis i eipaši Latgolys piļsātuos i cīmūs. Piec spūdruos debejis ruoduos dzīsmis “Dzeiveite” i “Latgaleite”, kurys ari tyka ībolsuotys “Latvijas šlāgeraptauja” finalā. Itūs 15 godu laikā izguojuši divi grupys albumi – “Daugaveņa” (2009) i “Latgaleite” (2012), tymūs skaņ taidys dzīsmis kai “Puiši mīļoj mārgys”, “Dzeivuot ir labi”, “Latgaļu regejs”, “Patrioti” i cytys, kuruos ir apdzīduotys sociali svareigys situacejis i vierteibys ar patriotisku nūskaņu.

Itūs 15 godu laikā Juris i Artūrs ir dorbuojušīs ari cytuos muzikalajuos apvīneibuos i soloprojektūs. Artūrs – apvīneibā “Ducele” i etnofolkgrupā “Laimas muzykanti”, Jurs – grupā “Dvinskas muzikanti”. Deļtam muziki pastreipoj, ka koncertā byus ari pa kaidai dzīsmei nu cytu projektu.

Beletus iz koncertu var nūpierkt “Biļešu paradīze” kasēs i škārsteiklā ITE.

Karteņa: apvīneiba “Patrioti.lg”, publicitatis foto
Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
15:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 13 @ 15:00 – 17:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]