Rokstu sagataveja: portals lakuga.lv

Kab veicynuotu literarū procesu Latgolā i latgaliski raksteitūs tekstu radeišonu Latvejā, jau catūrtū reizi latgalīšu kulturys kusteiba “Volūda”, sasadorbojūt ari ar portalu lakuga.lv, izsludynoj konkursu “Latgolys prozys skaitejumi 2023” i aicynoj pīsadaleit Latgolys kulturtelpai pīdareigūs prozys autorus.

Sasasaucūt ar storptautyskuo festivala “Prozas lasījumi” ituo gods aicynuojumu dagrīzt viereibys rakstnīkam kai profesejai, literaturys konkursa “Latgolys prozys skaitejumi 2023” moto itūgod ir “Es rokstu, bet voi tu skaiteisi?”. Autori aicynuoti īsyuteit pošu radeitūs i da tuo napublicātus tekstus latgalīšu rokstu volūdā voi latvīšu literarajā volūdā. Dorbi tiks vārtāti, vysu vaira izceļūt na teksta volūdu, bet literaruo teksta kvalitati i pīdareibu Latgolys kulturtelpai, tai atkluojūt regiona sovpateibu i paruodūt latgaliskumu juo plašuokajuos nūzeimēs. Konkursā īsnāgtūs dorbus vērtēs žureja Latvejis literaturys procesūs īsaisteitu cylvāku sastuovā. Konkursā treis vysuvaira punktu sajāmušī autori sajims atleidzeibys par dorbu publiciešonu 300, 200 i 100 eiro apmārā. 

Pīsadaleit konkursā “Latgolys prozys skaitejumi 2023” var, īsnādzūt dorbus – esejis, stuostus, romanu fragmentus (7000–12 000 zeimu apmārā) – da ituo gods 18. oktobra, syutūt tūs latgalīšu kulturys kusteibai “Volūda” iz e-postu lgsc@lgsc.lv ar nūruodi “Latgolys prozys skaitejumi 2023″.  Pīsacejumā juobyut teksta elektroniskajai versejai, ziņom par sevi (vuords, pavuorde, dzimšonys gods, nūsadorbuošona, eisa rodūšuo biografeja (3–4 teikumi)) i kontaktinformaceja (telepona numers, e-posts). Ar pylnu konkursa nūlykumu var īpasazeit ITE.

“Latgolys prozys skaitejumi 2023” nūslāguma pasuokums byus ituo gods 7. decembrī kluotīnē Rēzeknē. Lobuokūs tekstu autori pīsadaleis nūtikšonā ar sovu dorbu skaitejumim, sovpus uzvarātuojam ar sova dorba skaitejumu byus pīduovuota vareiba pīsadaleit ari festivala “Prozas lasījumi 2023” nūtikšonuos. Taipat 4. decembrī latgalīšu literaturai veļteitu vokoru latgalīšu kulturys kusteiba plānoj ari Reigā. 

Latgalīšu kulturys kusteiba “Volūda” ir navaļstiska organizaceja, kas apvīnoj cylvākus, kam ir svareigi saglobuot i atteisteit Latgolys i latgaliskū kulturtelpu, latgalīšu volūdu. Bīdreiba vysod ir raudzejuse vysu pyrma atbaļsteit jaunūs latgalīšu autorus i izdūt kvalitativu literaturu, viereibu vaira dagrīžūt jaunīšu auditorejai.

Festivals “Prozas lasījumi” nūteik nu 1995. goda, tū organizej Latvejis Rakstnīku savīneiba. Laika gaitā “Prozas lasījumi” nu nalela pasuocīņa Andreja Upīša dzimšonys dīnys pīmiņai izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki.

Konkursa “Latgolys prozys skaitejumi 2023” nūtikšonu atbolsta storptautyskais literaturys festivals “Prozas lasījumi 2023”, Vaļsts kulturkapitala fonds, “Valodu māja”, SIA “IGGI”, latgalīšu kulturys ziņu portals lakuga.lv i žurnals “Domuzīme”.

Īsavieršona pārnejuo gods festivala nūslāguma pasuokumā.