Rokstu sagataveja: portals lakuga.lv

22.–23. septembrī Rēzeknis Tehnologeju akademijā nūteik Latgolys storpkongress “Latgolys atteisteiba – drūšeibys pamats Latvejai i Eiropai”, kura laikā paneļdiskusejuos sprīž par Latgolys atteisteibys aspektim – drūšeibys vaicuojumim, reprezentacejis aspektim, t. sk., sadarbeibu ar Pūleju turisma atteisteibā, latgalīšu volūdys ilgtspieju i izgleiteibys kvalitati i daīmameibu.

Latgolys kongresa lāmumu izpiļdis padūmis (LKLIP) prīšksāduotuojs Agris Bitāns nūruoda, ka “pasuokuma mierkis ir turpynuot Latgolys kongresa uzstuodejumu i lāmumus, kai ari izrunuot aktualūs vaicuojumus izgleiteibā, volūdys lītuojumā i drūšeibā. Tei byus vēļ vīna vareiba atguodynuot sabīdreibai i vaļsts institucejom par Latgolys i latgalīšu volūdys interešu napīteikamu īvāruošonu.”

Latgolys storpkongresa tīšraide nu Rēzeknis Tehnologeju akademejis Aktu zālis:

Programa:

22. septembris

• 10.00–11.00 Svineiguo sēde. Latgalīšu kulturys bīdreibys (LKB) īguļdejums Latgolys kongresu organiziešonā i sadarbeiba ar Latgolys kongresa lāmumu izpiļdis padūmi (LKLIP) Rēzeknis nūvoda vokaluo studeja “Skonai”, vadeituoja Guntra Kuzmina-Jukna;
• 11.15–12.45 Latgolys reiceibys plans i storptautyska programa ES rūbežys styprynuošonai – konkreti sūļi ekonomikā i drūšeibā, paaugstynojūt Latgolys īdzeivuotuoju labkluojeibys leimeni i pīdereibys sajiutu Latvejai i Eiropai, moderators Aldis Bukšs, LKLIP;
• 13.45–15.15 Administrativi teritorialuo reforma – Latgolys teritorialuo kūpeiba i vaļsts i pošvaļdeibu instituceju teikluojums. Moderators Agris Bitāns, LKLIP;
• 15.30–17.00 Latgalīšu volūdys ilgtspieja sabīdreibā i publiskajā vidē – kai veicynuot pošvaļdeibu interesi i īsaisti i nu vaļsts pusis styprynuot atbolsta mehanismus latgalīšu volūdys publiskajai kluotbyutnei, moderators Daiņs Mjartāns, LKLIP.

23. septembris

• 09.00–10.15 Latgalīšu volūdys ilgtspieja izgleiteibā – kai panuokt školu īsaisti i interesi vuiceit i atbolstu volūdai školu programuos, moderators  Imants Slišāns, LKLIP;
• 10.30–11.45 Izgleiteibys pīejameiba i kvalitate Latgolā. Aktualī vaicuojumi: školu teikla optimizaceja, geopolitiskyskuo situaceja, augstuokuos izgleiteibys reforma, profesionaluos izgleiteibys kvalitate, moderators Ilga Šuplinska, LKLIP;
• 15.00 N. Rancāna konkursa nūslāgums Vīru kors “Graidi”, muokslinīcyskais vadeituojs Jānis Mežinskis, dirigents Edgars Kārklinieks.

Latgolys storpkongresa tīšraide nu Rēzeknis Tehnologeju akademejis 124. telpys

Programa:

22. septembris

• 11.15–12.45 Latgalīšu volūda plošsazinis leidzekļūs – kai veicynuot volūdys skaniešonu sabīdryskajā medejā i medeju pošu “mierktīceibu” tuos atbolstā. Kai panuokt regularitati satura veiduošonai latgalīšu volūdā, nūdrūšynuot origalsaturu, eipaši bārnu i jaunīšu auditorejai, moderators Ausma Sprukte-Kozule, LKLIP;
• 13.45–15.15 Latgalīšu volūdys lūma i izmontuojums turisma i omotnīceibys atteisteibys styprynuošonā, sadarbeibys īspiejis ar Pūleju, moderators Aivars Mackevičs, BalticTrawelnews.com direktors.

Latgolys starpkongress ir zeimeigs Latgalīšu kulturys bīdreibys (LKB) darbeibys atskaitis punkts, partū ka itamuos septembra dīnuos paīt 30 godu nu breiža kai LKB ir registrāta darbeibai, rysynojūt i aizstuovūt latgalīšu kulturys, volūdys i ekonomikys vaicuojumus. LKB ir īdybynuojuse Latgolys kongresu tradiceju 1992. godā, dūmojūt par pasaulē asūšūs latgalīšu centīņu apvīnuošonu i 1917. goda kongresa ideju turpynuošonu.  Ir cyts laiks, tok daudzi aizdavumi ir leidzeigi tim, kas beja Latgolys latvīšu kongresā Rēzeknē, partū svareiga sevkura daleibnīka īsaiste.

Pasuokuma nūslāgumā byus Nikodema Rancāna Latgolys regiona školuotuoju konkursa ceremoneja, kurā gūdynuos izcyluokūs, radūšuokūs školuotuojus, kas ryupejās par latgalīšu volūdys, vierteibu saglabuošonu, ir radūši i psihologiski atbolstūši pyrmsškolys, školys, profesionālajā ci augstuokuos izgleiteibys vidē.