Muzykanta stuosti, jauns albums, teatra īdviesme – Latgolys muziku i grupu koncertprogramu izlase

Muzykanta stuosti, jauns albums, teatra īdviesme – Latgolys muziku i grupu koncertprogramu izlase

Rokstu sagataveja: portals lakuga.lv

Ituo gods rudinī i zīmā vysā Latvejā skanēs vairuokys koncertprogramys, kurys sagatavejuši kai tautā īmeiļuoti Latgolys dzīduotuoji i grupys, tai ari cytu vītu muokslinīki, koncertprogramu centrā sūpluok sovai dailradei līkūt ari Latgolys tematiku, ļauds, dzīsmis i teatri. Portals lakuga.lv pīduovoj jau nūteikūšūs i gaidomūs koncertprogramu apkūpuojumu.

Rikardiona koncerts “Dzeja. Akordeons. Latgale”

Treis vuordu “Dzeja. Akordeons. Latgale” salykums pīcūs koncertūs Latvejā – jau izskaniejušūs Talsūs, Līpuojā, bet vēļ gaidomūs Olyuksnā, Valmīrā i Jelgovā – teik raksturuots kai “muzykali skaneiga i eipaša gaisūtne, pyrmatneigys sajiutys, etniskuo pīdareiba, latgalīšu unikaluo vīnkuoršeiba i sirsneiba”. Koncertprogramā apsavīnuos Inga Ruka-Lazdiņa, kura plotuoku atpazeistameibu dabuojuse ar 1994. godā komponātū dzīsmi “Ko man ar tevi padarīt”, kod “Mikrofona” aptaujā sajimtys ari nominacejis “Gada debija” i “Lipīgākais meldiņš”. Inga pīsadalejuse ari Latvejis Televizejis raidejumā “Sirdsdziesma”. Taipoš koncertprogramā pīsadaleis Rikardions aba Rihards Millers, kurs ari pīsadalejs vairuokūs TV šovūs i sajiems plotu atpazeistameibu pasasokūt vairuokom eipašu papularitati dabuojušom dzīsmem “Odiņš”, “Mīlas tuksnesis”, “Gliemezis”, “Vilciens”, “Mākoņos” i c. Sovpus trešuo koncertprogramys dalinīka Jura Ostrovska vuords ploti zynoms vysā Latvejā kai solo muokslinīkam, tai apvīneibys “Patrioti.lg” i grupys “Dvinskas muzikanti” dalinīkam, taipat kai juo komponātuos dzīsmis – “Daugaveņa”, “Viss tikai tev”, “Hej, bruoļ latgalīt”, “Vacuoku sāta”. Koncertu beleti daīmami ITE.

Andra Baltača monizruode “Muzikants ir cilvēks”

“Vairuok nakai 30 godus muzicejūt i pīsadolūt ļaužu gūdūs i svineibuos, pīdzeivuoti vysaidi atgadejumi – nu kuriozu situaceju, da smeļdzeigu osoru. Ar laiku ituos nūtikšonys folklorizejās, boguotynojās ar izskaitynuojumim i puortūp gondreiž par anekdotim. Itī stuosti ir peļnejuši tikt apkūpuoti, kab napagaistu i dūtu vareibu pasavērt iz muzykantim kai rodūšim, muzikalim i sirsneigim cylvākim,” tai stuosta monizruodis autors i izpiļdeituojs Andris Baltacs. Kūpumā rudinī vēļ gaidomys ostonis monoizruodis dažaiduos Latvejis vītuos. Izruožu režisors ir Ivars Lūsis. Rudiņa koncertprogramā 23. septembrī Andris Baltacis gasteis Krystapilī, piečuok Ciesīs, Modūnē, Reigā, Preiļūs i cytuos vītuos Latvejā. Beleti daīmami ITE.

Bet ituo gods golā Andris Baltacs kūpā ar dzīduotuoju Daini Skuteli plānoj koncertprogramu “Ar Latgali dziesmās un sirdī”, informaceju par programu sūlejūt dreizumā.

Latgolys rūženis – Aijis Rimšys – pīminis koncerti

29. i 30. septembrī Latgolys viestnīceibā “Gors” Rēzeknē i 7. oktobrī VEF Kulturys pilī Reigā nūtiks koncerti “Zem citām debesīm”, kurūs gūdynuos par Latgolys rūžeņu sauktū dzīduotuoju Aiju Rimšu (1967–2005). Koč ari Aijis Rimšys myusu vydā nav jau ilguoku laiku, juos dzīsmis turpynoj dzeivuot i skanēt, dzīduotuoja pamatuse deveņu albumu muzykalū montuojumu. Koncertūs pīsadeleis: Guntra Kuzmina, Ēriks Gruzniņš, Raitis Treijs („Zeļļi”), Normunds Liepiņš, Juris Ostrovskis ( „Patrioti.lg”), Gints Ločmelis („Gins un Es”), Andris Šīrants („Vēja runa”), Gita Dukaļska („Starpbrīdis”), grupa „Bruģis”, Andris Eriņš, „Dricānu dominante”, vokaluo studeja “Skonai” i cyti gosti. Beleti daīmami ITE.

Atsagrīsšona Latgolā

Vaira nakai 100 sovulaik nūspālātuos teatra izruodis “Latgola.lv”, kai ari Latgolys cylvāku spāks i humora dzierksts īdrūsynuojuši izruodis veiduotuojus sataiseit koncertizvadumu “Atgriežamies Latgolā”, kurs ituo gods rudinī byus nūsaverams Leivuonā, Valmīrā i Reigā, bet cyta gods suokuos ari Ventspilī. Koncertizvadumā apsavīnuojuši režisors Valdis Lūriņš, komponists Valdis Zilvers, dzīšmu tekstu autors Juoņs Peters, Latvejis Nacionaluo teatra akteri – Indra Burkovska, Dace Bonāte, Anna Klēvere, Voldemārs Šuoriņš i Mārcis Maņjakovs –, kai ari grupa “Baltie lāči. Latgalīšu stuostu, kuri skanēs koncertizvadumā, autore ir lugu serejis “Ontans i Anne”, kas ir izruodis “Latgola.lv” pamatā, radeituoja Danskovīte.

Grupys “Galaktika” Latvejis koncerttūre

2024. gods suokumā nu janvara da apreļa iz jaunuo albuma “Mums pieder tik daudz” koncertim vysā Latvejā – Ventspilī, Kruoslovā, Modūnē, Olyuksnā i cytuos vītuos – aicynuos klauseituoju īmeiļuotuo grupa “Galaktika”. Koncerti plānuoti daudzuos vītuos, tymūs grupys dybynuotuojim – solistam Normundam Zušam i tausteņinstrumentalistam Vitoldam Gornevam – dasavīnuos ari pavodūšuo grupa “Crazy Daisy”, kurā muzicej Raitis Keišs – bass, Gatis Ivans – gitarys, Mikus Rullis – bungys, Haralds Stenclavs – tausteņinstrumenti. “Tei ir eistyna prīcys šaļts, ka otkon varim byut kūpā, varim vīns ūtram snēgt lobys emocejis kai ar jaunuom dzīsmem, tai ar tom, kas jau zynomys i īmeiļuotys, tok par vysu svareiguokais – byušona sūpluok,” tai grupys “Galaktika” dalinīki. Koncertu beleti daīmami ITE.

Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
19:00 Grupys “Galaktika” albuma prezen... @ Kuldeigys kulturys centrs
Grupys “Galaktika” albuma prezen... @ Kuldeigys kulturys centrs
Apr 13 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]