Septembra pādejā dīnā Reigā otkon sabrauks latgalīši

Septembra pādejā dīnā Reigā otkon sabrauks latgalīši

Rokstu sagataveja: portals lakuga.lv

Jau trešū godu piec kuortys rudiņa saulgrīžu svātkūs latgalīši pīpiļdeis Latvejis Etnografiskuo breivdobys muzeja Latgolys cīma pogolmus – Latgolys Plānuošonys regions (LPR) sadarbeibā ar bīdreibu “Latgales tematiskie ciemi” ituo gods 30. septembrī nu 10.00 da 17.00 stuņžu organizej Mikeļa dīnys svātku tierdzeņu, kurā saimnīkuos amatnīki i mozī ražuotuoji nu vysys Latgolys, informej LPR puorstuovi.

Iz rudiņa ražys svieteišonu Mikeļa dīnā Latvejis Etnografiskajā breivdobys muzejā byus sabraukuši eistyni latgalīši ar saukli “Latgalīši Reigā brauc!”. Byus latgalīšu Mikeļa dīnys tiergs i latgalīšu vyrtuve, ļustis i daņči, Latgolys amatnīku meistarklasis i gruomotys, kas izdūtys latgalīšu volūdā.

Latgolys amatnīku meistarklasēs sovu omotu ruodeis kūkamatnīks Juoņs Spuriņš, pūdnīki Paulini, kaļvs Valerijs i Vyšku amatnīku cīma ļauds ar Valdi Grebežu prīškgolā. Saimem byus vareiba rodūši dorbuotīs sviļpaunīku, peišonys i stykla vitražu darbneicuos.

Latgolys meistari pīduovuos nūpierkt šmukys i gordys duovonys, suvenirus i sev teikamus keramikys, kūkamatnīceibys i stykla izstruoduojumus, vysaiduoka veida tekstila precis, dizaina uodys sumkys, postolys, rūtys i daudzi kuo cyta. Sovpus Latgolys regionalī turysma informacejis centri stuosteis par turysma vareibom, kulturviesturiskajom vierteibom i amatnīceibys tradicejom Latgolys regionā.

Latgolys vyrtuvē byus vareiba baudeit gordys putrys i cytus lobumus nu zemnīku saimisteibys “Kotiņi” pošu ražuotuos produkcejis, “Latgolys golds” pīduovuos nūgaršuot eistus kiupynuojumus nu Latgolys malnuos piertenis, byus ari “Mūsu pankūkas” nu Rēzeknis. Vysys dīnys garumā skanēs latgalīšu muzyka i byus daņči ar kapelu “Augusti”, “Līvenhofas muzikantiem” i tautys deju kūpu “Silaviņa”. Ļustis vadeis Oskars Bierzeņš. Nūtiks ari konkursi ar vareibu sajimt bolvā amatnīku izstruoduojumus, taipoš ari latgalīšu volūdys vuiceišonuos mudrī kursi.

Print Friendly, PDF & Email

Kalenders

Mar
7
Cat
16:00 Valentina Lukaševiča gruomotys “... @ Latgolys Centraluo biblioteka
Valentina Lukaševiča gruomotys “... @ Latgolys Centraluo biblioteka
Mar 7 @ 16:00 – 17:30
7. martā 16.00 stuņdēs Daugovpilī, Latgolys Centralajā bibliotekā, 2. stuovā (Reigys īlā 22a) nūtiks Valentina Lukaševiča vītu stuostu kruojuma “Dīnvydlatgolys stuosti” prezentaceja i sasatikšona ar autoru. Gruomotys 39 stuostūs autors, ceļojūt na tik telpā, bet[...]