Rēzeknē gūdynuoti Latgolys izcyluokī pedagogi

Rēzeknē gūdynuoti Latgolys izcyluokī pedagogi

Rokstu sagataveja: portals lakuga.lv

Sastdiņ, 23. septembrī, piec Latgolys storpkongresa nūslāguma Rēzeknis Tehnologeju akademejā nūtyka Nikodema Rancāna konkursa, kurā teik gūdynuoti Latgolys izcyluokī pedagogi, bolvys pasniegšonys pasuokumus. Bolvys sajēme školuotuoji nu Bolvu, Kruoslovys, Preiļu, Rēzeknis nūvodim i Rēzeknis vaļstspiļsātys.

N. Rancāna bolvai itūgod beja dasaceiti 14 pretendenti nu pīcu Latgolys pošvaļdeibu. Konkurss ļaun izceļt i gūdynuot lobuokūs nūzaris pedagogus, ceļūt školuotuoja profesejis prestižu sabīdreibā i atguodynojūt, cik svareiga lūma puormeju procesā ir izgleiteibai.

Itūreiz pretendenti puorstuovēja divejis pamata nominacejis: par īguļdejumu un sasnāgumim latgalīšu volūdys, kulturviesturis un nūvoda vuiceibys īvīsšonā un īdzeivynuošonā školā i par rodūšu i psihologiski atbolstūšu pīeju vuiceibu ci studeju vidē, jo divejuos nominacejuos nabeja īsnāgts nivīns dasacejums. Kai pyrma konkursa nūslāguma pīzyna bolvys reikuotuoju puorstuove Ilga Šuplinska, itūgod varēja redzēt Dzīšmu svātku goda sajiutu – puse nu dasacejumu bejuši saisteiti ar muzyku i pošaizlīdzeigu, rodūšu davumu taišni itamā jūmā.

Itūgod Nikodema Rancāna bolvys i rūtkaļa Riharda Cibļa taiseitūs saktu sajiemieji nominacejā par īguļdejumu i sasnāgumim latgalīšu volūdys, kulturviesturis i nūvoda vuiceibys īvīsšonā i īdzeivynuošonā školā ir:

  • Rēzeknis nūvoda Drycānu vydsškolys školuotuoja Silvija Laizāne;
  • Bolvu nūvoda Baļtinovys vydsškolys školuotuoja Annele Slišāne;
  • Preiļu nūvoda Rībeņu vydsškolys školuotuoja Ārija Pudule;
  • Rēzeknis vaļstspiļsātys Rēzeknis suokumškolys školuotuojs Juoņs Veličko.

Nominacejā par rodūšu i psihologiski atbolstūšu pīeju vuiceibu ci studeju vidē bolvu sajēme Kruoslovys nūvoda Kruoslovys gimnazejis školuotuoja Ilga Stikute.

Jau ūtrū godu sovu eipašū specialbolvu pasnēdze bīdreiba “Latgolys etnografiskuo viestnīceiba”, kurys vadeituojis Ivetys Seimanovys duovynuotū mozū tautumeitu – leli Vydsmuižys Annužu – Rēzeknis nūvoda Viļānu muzykys i muokslys školys direktore i školuotuoja Inta Brence.

Piec bolvys sajimšonys Drycānu vydsškolys školuotuoja Silvija Laizāne saceja: “30 godi beja vajadzeigi, lai beidzūt školys Latvejā byutu latvyskys. Es ceru, ka navajadzēs vēļ 30 godu, lai Latgolys školuos byutu koč kaids latgaliskys muoceibu prīškmats – na viņ fakultativs, bet taišni muoceibu prīškmats “Latgalīšu volūda”. Juoapsazynoj, ka mes asam unikali – Eiropys pyrmtautys arhaiska daļa i itei atbiļdeiba taišni školuotuojim ir juoīlīk. Lai nav tai, ka ziņuos nu Latgolys skaņ viņ luoči, vylki i tei migrantu maidzeišona pi rūbeža, bet ka te ir pylnys školys ar latgaliski runojūšim bārnim, ar školuotuojim, ari raksteituojim. Lai ite ir brangi veiri, kurim ir lelys saimis, i lai tei nav viņ rauduošona, kaidi mes asam buorineiši, kaida nūmale, bet apsazynuotu unikalitati, struoduotu, raktu, lai mes napalīkam viņ viesturei, bet drūši īeimam nuokūtnē!”

Vysi puorejī bolvys nominanti – Svetlana Bilinska nu Rēzeknis suokumškolys, Anita Klovāne nu Rēzeknis vaļsts pūļu gimnazejis, Sandra Nemeņonoka nu Kruoslovys gimnazejis, Marija Mazure nu Nautrānu vydsškolys, Daiga Griestiņa nu Bierzpiļs pamatškolys, Silvija Slavika nu Rēzeknis vaļsts pūļu gimnazejis, Rita Andrejeva nu Kruoslovys Varaveiksnis vydsškolys i Ilze Valeniece nu Viļānu vydsškolys strukturvīneibys Dekšuoru pamatškola – sajēme atzineibys rokstus.

Konkursa nūslāguma pasuokumā beja vareiba dzierdēt veiru kora “Graidi” uzastuošonu, nūtikšonu vadeja Sandis i Ingūna Bulduri, bet bolvys padevieji beja 14. Saeimys deputati Anna Rancāne i Česlavs Batņa, Eiroparlamenta deputate Dace Melbārde, Rēzeknis nūvoda prīšksādātuoja vītineica Ērika Teirumnieka, . Konkursu organizēja Latgalīšu kulturys bīdreiba sadarbeibā ar Ludzys, Preiļu, Rēzeknis, Bolvu i Kruoslovys nūvoda pošvaļdeibom.

Vysu pasuokuma īrokstu var nūsavērt ite (nu 5:55:00):

Fotogalerejā konkursa nūslāguma pasuokums, foto Edeite Laime/portals lakuga.lv

Print Friendly, PDF & Email

Kalenders

Apr
25
Cat
11:00 Festivals “Steigys” @ Juoņa Ivanova Rēzeknis muzykys vydsškola
Festivals “Steigys” @ Juoņa Ivanova Rēzeknis muzykys vydsškola
Apr 25 @ 11:00 – 17:00
Festivals "Steigys" @ Juoņa Ivanova Rēzeknis muzykys vydsškola
18:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 25 @ 18:00 – 20:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]
19:00 Koncerts “Celīs, bruoļ!” @ VEF Kulturys piļs
Koncerts “Celīs, bruoļ!” @ VEF Kulturys piļs
Apr 25 @ 19:00 – 21:00
Koncertā pīsadola kai jau populari i labi pazeistami, tai i pavysam jauni, dažaidus muzykys stilus puorstuovūši muokslinīki: Juoņs Aišpurs (THE SOUND POETS), Arņs Slobožaņins (DABASU DUROVYS), Guntis Rasims i Jurs Vucāns (BEZ PVN), Jurs Ostrovskis[...]