Rokstu sagataveja: portals lakuga.lv

Dzīsmineica Laura Bicāne sadarbeibā ar Andri Lazdānu i vokalū ansambli “Anima Corde” klauseituojim pīduovoj dzīsmis “The Blessing” kaververseju latgalīšu volūdā, informej muzike.

Laura Bicāne stuosta, kai jei tykuse pi ituo projekta realiziešonys: “Vysapyrma es izguoju dzīsmi vuocu volūdā “Der Herr segne dich” (tulkuojumā nu vuocu volūdys – tys Kungs lai tevi svietej) i tik piec kaida laiceņa saprotu, ka tei nav originala kompoziceja. Originaldzīsme angļu volūdā “The Blessing” īraksteita 2020. gods suokuos. Tuos autori par dzīsmis pamattekstu jāmuši pantus nu 4. Mozus gruomotys 6. nūdalis. Tī ir lyugšonys vuordi par tū, lai Dīvs svietej i pasorgoj. Atguoduosim, ka ar 2020. godu suocēs pandemejis laiki. I itei dzīsme guoja kai īdrūsynuojums bādu laikā. Es kuoreigai meklieju kaverversejis i sasajiusmynuoju, ka dzīsme ir puortulkuota tik daudzuos volūduos. Tyku pi kaverversejis leitovīšu volūdā, i mani puorjēme bolta skaudeiba, ka pat sābri jau paspiejuši iztulkuot itū dzīsmi. Manī dzyma idejis, kai es varātu radeit verseju latvyski. Gols golā saprotu, ka maņ juotulkoj itys teksts latgalīšu volūdā. Tys nūteikti beja pareizs lāmums, jo izguoju jau gotovu kaververseju latvyski. Paļdis Līpuojis centra draudzis muzikim par tū.“

Dzīsmis īrokstā latgalīšu volūdā pīsadaleja Laura Bicāne, Vyšku pogosta sabīdryskuo centra sīvīšu vokalais ansamblis “Anima Corde”, kai ari dīdžejs i producents Andris Lazdāns.

Latgalīšu dzīsmineica Laura Bicāne aktivi turpynoj sovu muzykalū darbeibu. Pavysam naseņ jau izguoja ari jauna dzīsme latvīšu literarajā volūdā “Tu atgriezies”, kas radeita kūpā ar muziki Lauri Valteru.