Pušmucovā jau divdasmytū reizi nūtiks tautys muzykantu saīts
Rokstu sagataveja: portals lakuga.lv
30. septembrī 19.00 stuņdēs Ludzys nūvoda Pušmucovā nūtiks jau 20. Tautys muzykantu saīts, kurā muzicēs kai individualī muzykanti, tai ari muzykantu grupys, informej pasuokuma organizatoru puorstuove Iveta Dukaļska. Jubilejis reizē paradzāta ari muzykantu gūdynuošona.
Tautys muzykantu saīts Pušmucovā pyrma 20 godu, 2003. godā, beja pyrmais na viņ tūreizejā Ludzys rajonā, tok ari pyrmais pasuokums Latvejā, iz kurū muzicēt aicynuoja individualūs tautys muzykantus aba “sātys” muzykantus. Muzykanti-vacmeistari nu muzykys školu školuotuoju i cytu skotivis muzykantu atsaškir ar tū, ka pi muziciešonys prasmu tykuši pošvuiceibys ceļā i puormontuojuši tuos nu paaudzis paaudzē. Ryupi par apleicīnis muzykantu apzynuošonu i puļceišonu Pušmucovā uzajāmuse kulturys noma vadeituoja Inta Domarka.
Ari itūgod Tautys muzykantu saītā Pušmucovā uzastuos muzykanti, kuri tymā pīsadola kotru godu nu pošu pyrmsuokumu, pīmāram, Daiņs Ločmelis (Ludzys nūvods, Saļņova), Aivars Zeiļuks (Ludzys nūvods, Saļņova), Zinaīda Kaupuža (Ludza) i cyti.
Itūgod saītā muzicēs vaira nakai 60 daleibnīku, tymā skaitā Zinaīda Poltanova-Ločmele (Ludzys nūvods, Saļņova), Arta Galvanovska (Ludzys nūvods, Saļņova), Mārtiņš Jurciņš (Ludzys nūvods, Kuorsova), Vladimirs Mihaiļuks (Ludzys nūvods, Ņukši), Eventijs Zelčs (Bolvi), Leons Bērziņš (Bolvi), Andris Kazinovskis (Bolvi), Genādijs Rudakovs (Bolvu nūvods, Žeiguri), Vitālijs Plešs (Bolvu nūvods, Vactiļža), Venērs Dūre (Bolvu nūvods, Ruguoji), Juoņs Mukans (Daugovpiļs), Irēna Znūteņa (Rēzekne), Pīters Belinskis (Rēzeknis nūvods, Rogovka), Pušmucovys etnografiskais ansamblis “Olūti” (Ludzys nūvods, Pušmucova), Saļņovys kapela “Sveicynojam vielejam” (Ludzys nūvods, Saļņova), kapela “Malnavas muzikanti” (Ludzys nūvods, Malnova), Zviergzdinis kapela “Saime” (Ludzys nūvods, Zviergzdine), Baļtinovys kapela (Bolvu nūvods, Baļtinova), Tautys muzykys kūpa “Sēļu muižas muzikanti” (Valmīrys nūvods, Sieli), duets “Arrē” (Ludzys nūvods, Cybla) i cyti.
Īīšona pasuokumā – bez moksys. 20. Tautys muzykantu saītu Pušmucovā atbolsta Ludzys nūvoda pošvaļdeiba, Tautys muzykantu bīdreiba i Pušmucovys pogosta puorvaļdis, bibliotekys i kulturys noma darbinīki ar sovu breivpruoteigai īguļdeitū dorbu.
