Rokstu sagataveja: portals lakuga.lv

Turysma goda bolvys pretendentu dasaceišona ir lobs veids, kai izceļt tuos turysma vītys i puorstuovus, kuri sovā pakolpuojumā voi produktā īvīsuši inovacejis, byutiski papyldynuojuši asūšū pīduovuojumu, voi vīnkuorši atstuojuši palīkūši lobu īspaidu. Dasaceit pretendentus “Latgolys turysma bolvai 2023” var sevkurs interesents, kai privatpersona, tai uzjāmums, NVO i cyti, informej Latgolys Turysma asociacejis puorstuovi.

Latgolys Turysma goda bolvu jau ostuotū godu piec kuortys organizej Latgolys Turysma asociaceja. Goda bolvys mierkis ir veicynuot Latgolys turysma pīduovuojuma i kvalitatis uzalobuošonu, kai ari izceļt i apbolvuot Latgolys regiona (t.sk. kulturviesturiskūs zemu teritorejis) lobuokūs nūzaris puorstuovus. Goda bolva teik pasnāgta septeņuos dažaiduos nominacejuos, bolvys pretendentus izviertej Goda bolvys komiseja, kurys sastuovā ir Latgolys pošvaļdeibu turysma nūzaris specialisti, īprīškejuos goda bolvys sajiemieji i Latvejis mārūga turysma specialisti. Ar Goda bolvys nūlykumu var īpasazeit ITE.

“Godu īprīšk Goda bolvai tyka dasaceiti 34 pretendenti, kas, saleidzynojūt ar cytim godim, nav cīši daudz. Tok saprūtams, ka ari Latgolys turysma nūzare beja ītekmāta nu vysaiduoku pasauļa mārūga nalobu nūtikšonu, vystik cīši ceram, ka itūgod dasacejumu skaits otkon pīaugs, mes zynam, ka regionā ir saiminīki ar kurim pa vysam nūteikti var lapnuotīs i jī ir peļnejuši plotuoku atzineibu,” stuosta Latgolys Turysma asociacejis turysma specialiste Laura Spundere.

Goda bolvys kategorejis:

1. Turysma profesionaļs (padūd Turisma informacejis centram voi individualam komersantam – gidam, žurnalistam, blogeram/vlogeram i cytim).
2. Lobuokuo turystu mītne piļsātā
3. Lobuokuo turystu mītne laukūs;
4. Lobuokais jaunais turysma objekts (padūd turysma objektam, kurs ir sataiseits pādejūs diveju godu laikā);
5. Goda amatnīks/muojražuotuojs/uzjiemiejs;
6. Lobuokais turysma produkts (padūd kvalitati pīruodejušam turysma objektam naatkareigi nu juo izveidis goda);
7. Lolitys Kozlovskys izcileibys bolva turysmā (padūd turysma jūmys profesionaļam, kas devs vārā jemamu īguļdejumu sova regiona ci vysys Latgolys turysma jūmys atteisteibā).

Dasaceit pretendentus var, aizpyldūt tīšsaistis anketu, da 2. novembra. Anketa daīmama ITE.

Bolvu padūšona nūtiks piec kasgadejuos Latgolys Turysma konferencis, kura itūgod byus 30. novembrī Bolvu Kulturys centrā (Breiveibys īla 61, Bolvi). Plotuoka konferencis programa byus daīmama jau dreizumā.