Latgalīšu volūdys pratiejus aicynoj īsasaisteit tekstu īrunuošonā volūdys tehnologeju atteisteišonai

Latgalīšu volūdys pratiejus aicynoj īsasaisteit tekstu īrunuošonā volūdys tehnologeju atteisteišonai

Rokstu sagataveja: portals lakuga.lv

Ar mierki saglobuot cytom paaudzem līceibu par myusu dīnu latgalīšu volūdu i tuos unikalitati, kai ari veicynuot tū, ka modernuos tehnologejis jādz “saprast” i “sasarunuot” tamā, sabīdryskuos iniciativys “Balsu talka” eistynuotuoji aicynoj latgalīšu volūdys lītuotuojus īsasaisteit latgaliskūs tekstu īrunuošonā, kai ari puorbaudeit jau īrunuotūs teikumus. Tū var izdareit teiklavītā balsutalka.lv/ltg.

“Balsu talka” ir projekts latvīšu volūdys reitdīnai. Tuo mierkis ir īmyužynuot myusdīnuos runuotū latvīšu volūdu i nūdrūsynuot latvīšu volūdys daīmameibu tehnologeju atteisteibai. Iniciativa latvīšu volūdys atteisteibai tehnologejuos īsuokta ituo gods pavasarī, bet niu, rudinī, davīnuota vareiba kotram latgalīšu volūdys lītuotuojam paleidzēt ari latgalīšu volūdys īdzeivynuošonai myusu dīnu tehnologejuos.

Karteņā: ekransuovīņs nu balsutalka.lv/ltg

“Latgalīšu volūda ir unikala i cīši svareiga latvyskuos identitatis daļa. Ka gribim tū saglobuot cytom paaudzem, par tū ir juodūmoj jau niu. Itūšaļt latgalīšu volūdu kasdīnys saziņā izmontoj aptyvai 165 000 cylvāku, kas ir deveni procenti nu vysu Latvejis dzeivuotuoji. Tok volūdys lītuotuoju skaits eipaši jaunuokuos paaudzis vydā sasamazynoj, deļtuo aicynojam latgalīšu volūdys pratiejus īsasaisteit itymā projektā, davīnuot sovu bolsu i tai snēgt sovu davumu tuos saglobuošonā,” aicynoj “Balsu talkys” latgalīšu volūdys projekta “Bolsu tolka” vadeituoja, Latvejis Universitatis Matematikys i informatikys instituta (LU MII) Muoksleiguos intelekta laboratorejis zynuotniskuo asistente Kristīne Pokratniece.

“Bolsu tolkys” latgalīšu volūdys verseja dorbojās piec taida poša principa kai latvīšu volūdys iniciativa. Tamā ir vareiba kai īrunuot vysmoz pīcus teikumus nu pīduovuotuo teksta, tai puorbaudeit jau īrunuotū materialu. Laiks, cik teiklavītā balsutalka.lv/ltg veļteit iniciativai, ir kotra interesenta breiva izvēle – tuos var byut kai puora minutys viņ īrunuošonai voi viņ puorbaudei, tai, ka ir vareiba i interese, garuoka šaļts.

Karteņā: ekransuovīņs nu balsutalka.lv/ltg

“Bolsa paraugu īraksteišona i īrunuotūs stuņžu puorbaudeišona “Bolsu tolkā” snādz ari tehnologiskus lobumus. Sasnādzūt nūsaceitu īrunuotūs stuņžu skaitu, tei var tik izmontuota modernajuos tehnologejuos, snādzūt vareibu cylvākam dūt komandys i “sasazynuot” ar īreici latgaliski,” izsver vīns nu projekta “Balsu talka” iniciativys autoru i programaturys tulkuotuojs Raivis Dejus.

Īrunojamī teksti latgaliski ir kai teikumi, tai atseviški vuordi, kurus izmontuošonai teiklavītā atlasejuši Rēzeknis Tehnologeju akademejis i LU MII eksperti. Atlaseitūs teikumu vydā ir ari latgalīšu kulturys ziņu portalā lakuga.lv publicātī teksti.

Iniciativu “Balsu talka” organizej LU Matematikys i informatikys instituts, LU Literaturys, folklorys i muokslys instituts, Latvejis atvārtūs tehnologeju asociaceja, UNESCO Latvejis Nacionaluo komiseja i Rēzeknis Tehnologeju akademeja sadarbeibā Latvejis Nacionalū kulturys centru i latgalīšu kulturys kusteibu “Volūda”.

Projektu atbolsta Atsaveseļuošonys i nūtureibys mehanisma plāna projekts “Volūdu tehnologeju iniciativa” i Vaļsts pietejumu programa Digitaluos humanitaruos zynuotnis (VPP-IZM-DH-2022/1-0002).

Print Friendly, PDF & Email

Kalenders

Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]