Rokstu sagataveja: portals lakuga.lv

Itūreiz par nedelis kulturys īsacejumim pasaryupejuse Leivuona Stykla i amatnīceibys centra vadeituoja Ilze Griezāne, kurei zynoma ari kai vīna nu muokslineicu apvīneibys V.I.V.A dalineicu.

Sasasiļdi

Rudiņa suokumā vēļ pagryuši puorsaslēgt iz soltū laiku. Septembris itūgod beja izcyli sylts, deļtam viņ oktobrī valkam uorā syltuos drēbis. Tai viņ i gribīs nūbraukt iz Italeju voi Egipti, kab tik nasajust rudiņa vieju, soltumu i draņkeigū laiku. Tok es īsoku tymā vysā saskateit pozitivū i sasasiļdeit tepat sātā – ar syltu čaju voi sovu tyvynīku samīļuošonu, voi vīnkuorši atbraukt gostūs iz Leivuona Stykla i amatnīceibys centra stykla pyusšonys darbneicu, kur vysod ir cīši sylts. Styklys tūp gunī, i kruosni, kurā atsarūn stykla masa, nikod naslādz uorā, saglobojūt tymā 1300 gradu temperaturu. Vāruot stykla pyutieja dorba procesu ir fascinejūši!

Izbaudi rudini

Izbrauc kaidā tematiskajā, par pīmāru, muokslys ekskursejā. Sadūmoj maršrutu, atrūni kulturys vītys, kas pīduovoj tev interesejūšys izstuodis, i aizīt! Pa ceļam pasaprīcoj par rudini – pasauļa lobuokū muokslinīku! Es īsoku muokslys maršrutu Leivuons-Daugovpiļs-Rēzekne. Leivuonā pagastej Stykla i amatnīceibys centrā, kur itūšaļt apsaverama Ilgvara Zalāna gleznīceibys izstuode “Citas dimensijas”, Daugovpilī īsagrīz Daugovpiļs Nūvodpietnīceibys i muokslys muzeja gleznuotuoju apvīneibys V.I.V.A. izstuodē “Mākslas garša”, cikom Rēzeknē Latgolys viestnīceibā “Gors” baudi Rotko muzeja kolekcejis gleznīceibys izstuodi “Sarkanā”.

Izdori kū naviņ vierteigu

Tys, kū es poša dareišu itamā nedeļā – vysudreizuok izspīsšu uobuļu sulu i kaidu vokoru izcepšu uobuļu peirāgu. Tai dorbojūtēs dūmuos likšu scenareju goda nūgalis nūzeimeiguokajai balleitei – Leivuona Stykla i amatnīceibys centra 20 godu jubilejis pasuokumam. Plotuoka informaceja vēļ byus i vysi laipni aicynuoti!

Peirāga recepte nu Ilzis mamys kruojumu

Meiklei: 2 ūlys, 300 gramu svīksta, pusgluoze cukra, 0,5 kg myltu, čipierksneits suoļa i 1 čaja lizeika capamuo puļvera. Gabaleņūs sagrīztu voi sarīveitu svīkstu sajauc ar myltim, davīnoj puorejuos sastuovdalis i līk iz plāts. Iz meiklis līk škielēs sagrīztus uobuļus.

Uobuļu puorlīšonai:
3 ūlys, 1 gluoze cukra, 0,5 litra skuobuo kriejuma, 3 ādamuos lizeikys myltu, vanilis cukrys. Vysu sajauc i puorlej uobulim. Ka garšoj, pa viersu pakaisa kanieli. Līk ceptīs cepeškruosnī cikom gotovs.