Daugovpilī nūtiks apleicīņu aktivismam veļteiti pasuokumi

Daugovpilī nūtiks apleicīņu aktivismam veļteiti pasuokumi

Rokstu sagataveja: portals lakuga.lv

Bīdreiba “Cita Daugavpils”, kuruos mierkis ir Latvejis ūtrajā leluokajā piļsātā veicynuot piļsūniskys i Eiropys vierteibuos baļsteitys inicitativys, aicynoj itūrudiņ pīsadaleit vairuokūs pasuokumūs, kas saisteiti ar apleicīņu aktivismu. Diveji nu tūs byus jau itūnedeļ, 20. oktobrī, sovpus trešais – 1. decembrī.

“Atteisteitys apleicīnis veidoj atteisteitu piļsātu, partū piļsātys spāks ir tuos apleicīnēs. Tys, kai jiutomēs sovā apleicīnē, raksturoj ari tū, kai jiutomēs sovā piļsātā. Apleicīņu spāks rūnās tod, kod tamuos suoc rūseitīs apleicīnis dzeivuotuoji, organizejūt sasatikšonys, pasuokumus i cytys aktivitatis. Tuos paleidz īpazeit apleicīņu atškireibu, skaidruok saredzēt kotrys apleicīnis resursus i vajadzeibys, sasadraudzēt ar sābrim, sasaorganizēt kūpeigom reiceibom i sovā apleicīnē justīs kai sātā,” nūruoda bīdreibys “Cita Daugavpils” puorstuovi.

Bīdreiba “Cita Daugavpils” tyka nūdybynuota taišni pyrma goda kai Daugovpiļs Eiropys kulturys golvyspiļsātys dasacejuma programys ideju turpynuotuoji. Apleicīņu aktivisms ir vīna nu jūs darbeibys jūmu, kur jau sasnāgti ari pyrmī rezultati – kotrai Daugovpiļs apleicīnei sataiseits sovs teritorialais logo, majā nūtics pasuokumūs, kurā Daugovpiļs apleicīņu aktivi dalejuos leidzdaleibys stuostūs.

20. oktobrī paradzāti diveji pasuokumi. Vysapyrma 10.00 Vīneibys noma mozajā zālē nūtiks seminars “Kultūra mājo pilsētu apkaimēs”, kū vadeis bīdreibys “Cita Daugavpils” puorstuove Inga Belousa. Tys ir daļa nu Vīneibys noma realizātuo projekta “Latgales reģiona kultūras jomas darbinieku kapacitātes celšana III”. Seminaram juopīsasoka, rokstūt iz kultura@daugavpils.lv. Sovpus 13.00 Rotko muzeja konferenču sektorā paradzāta dūmneica “Garda pēcpusdiena kopā ar savējiem. Kā ieraudzīt un izmantot savas iespējas”. Tys ir daļa nu Labkluojeibys ministrejis projekta “Profesionāla sociālā darba attīstība pašvaldībās”, kab veicynuotu sadarbeibu storp vītejim dzeivuotuojim, pošvaļdeibu, NVO i socialū dīnastu, tai styprynojūt uzaticiešonu kūpīnys vydā. Pīsasaceit tam var ITE.

Tikom 1. decembrī 13.00 stuņdēs Vīneibys noma Mozajā zālē byus vuiceibu seminars “Kultūra apkaimēs un neatklātās apkaimju kultūrvietas”, kū vadeis bīdreibys “Divruna” puorstuove Zane Melāne. Itū seminaru organizej bīdreiba “Cita Daugavpils” kai daļu nu projekta “Kultūras ilgtspējas kapacitātes stiprināšanas programma”. Pīsasaceit seminaram var ITE.

Iz pasuokumim gaideiti vysi, kurim interesej leidzsvaruotai atteisteita piļsātys kulturvide, piļsūniskuo leidzdaleiba i apleicīņu aktivisms kai Daugovpilī, tai cytuos piļsātuos, eipaši Latgolā.

Print Friendly, PDF & Email

Kalenders

Apr
13
Sai
all-day Osvalda Zvejsalnieka pīminis izs... @ Latgolys Kulturviesturis muzejs
Osvalda Zvejsalnieka pīminis izs... @ Latgolys Kulturviesturis muzejs
Apr 13 all-day
Izstuodē tiks eksponātys muokslinīka gleznys nu Latgolys Kulturviesturis muzeja Muokslys kolekcejis, kas puorsvorā atspīgeļoj juo agreimū rodūšū darbeibu 20. g. s. 70. godūs, kai ari 80. godu rodūšajā pylnbrīdā radeituos lelformata figuraluos kompozicejis i portretus.
15:00 “Pauls un Keišs. Vīrieši labākos... @ Muzykys noms "Daile"
“Pauls un Keišs. Vīrieši labākos... @ Muzykys noms "Daile"
Apr 13 @ 15:00 – 17:00
Latvīšu estradē, latvīšu teatrūs i Latvejis politiskajā dzeivē ir daudz veirīšu lobuokūs godūs. Iz skotivis byus diveji – vīns nu estradis i džeza, ūtrys nu teatra i kinys pasauļa. Tok – kotrys nu prīšknasumu var[...]