Rokstu sagataveja: portals lakuga.lv

Latgolys cylvāku spāks i humora dzierksts, kai ari vaira nakai 100 nūspālātuos “Latgola.lv” izruodis īdrūsynuojušys autorus veiduot jaunu koncertizvadumu “Atgriežamies Latgolā”. Itamā kompanejā ir apsavīnuojuši režisors Valdis Lūriņš, komponists Valdis Zilveris, dzīšmu i tekstu autors Jānis Peters, Latvejis Nacionaluo teatra akteri i grupa “Baltie lāči”. Latgalīšu stuostus pīrakstejuse Danskovīte aba Anita Ločmele, kura zynoma ari kai “Ontana i Annis” radeituoja.

Kas var byut interesantuoks par patīsim stuostim, kurus klausūtīs mute palīk vaļā: “Ej, nu ej, voi tod tai eistyn var byut?” Latgolys stuosti ir stypri i tikpat kruosaini kai Latgolys keramika, viesteits koncertizvaduma aprokstā. Latgolys stuostus izspēlēs i izdzīduos Nacionaluo teatra akteri Indra Burkovska, Dace Bonāte, Anna Klēvere, Voldemārs Šoriņš i Mārcis Maņjakovs. Ailinīka Jāņa Petera i komponista Valda Zilvera muzyka sasaveis kūpā ar eistynym Latgolys patriotim – grupu “Baltie lāči” i tuos solistu Andri Baltaci.

Režisors Valdis Lūriņš aicynoj: “Cerams, ka skateituoju sirds uzrunuosim ar komiskom i realom epizodem, muzykalu dauzeišonūs, kai ari sasadzīduosim labi zynomajuos i trokajuos latgalīšu dzīsmēs!”

Sovpus, kai stuosta vīns nu koncertizvaduma dalinīku, Andris Baltacs, kura tāls izvadumā byus muzykants Geņuks, skateituoji var sasagataveit iz eistynu emoceju buketu. “Itūreiz koncertizvadumā byus na viņ humoristiskys ainys, tok ari atseviškys lītys, kurys liks aizadūmuot, pīmāram, parkū Latgola ir taida, kaida ir, i parkū rūbeži palīk tukšuoki. Maņ pošam i grupai “Baltie lāči” ir cīši lels gūds i ari lela atbiļdeiba byut kluotyn taidā izruodē,” stuosta Andris Baltacis, kurs ari dasoka, ka itūšaļt zynoms, ka “Atgriežamies Latgolā” tiks spālāts vysmoz leidz 2024. goda vosorys nūslāgumam. Beletus iz koncertizvadumu var nūpierkt ITE.