Reigys latgalīši – folklorys kūpa “Ceidari” – īrakstejuši Bierzpiļs dzīšmu albumu i aicynoj iz koncertim

Reigys latgalīši – folklorys kūpa “Ceidari” – īrakstejuši Bierzpiļs dzīšmu albumu i aicynoj iz koncertim

Rokstu sagataveja: portals lakuga.lv

Jau desmit godu Reigā dorbojās folklorys kūpa “Ceidari”, kurā apsavīnuojuši Reigā i apleicīnē dzeivojūši latgalīši. Niu, reizē aicynojūt iz koncertim 2. novembrī Reigā i 4. novembrī Bolvu nūvoda Bierzpilī, kūpa izdavuse digitalū albumu “Dzīduotumi, ļustātumi”, kas veļteits Bierzpiļs pusis dzīduotuojim i jūs dzīsmem, viestej folklorys kūpys publicātuo informaceja.

Latgalīšu kulturys kusteibys “Volūda” folklorys kūpa “Ceidari” Reigā roduos 2013. gods majā, kod dzīduot grybātuoju aicynuojumam īsavuiceit jaunys dzīsmis i sasatikt, lai regulari padzīduotu, atsasauce etnomuzykologe Marta Sīle (tūlaik Vaivode), uzajemūt tamā šaļtī vēļ naformaluos dzīduotuoju grupys vadeišonu. Jau piec napylna goda dzīduotuoji kai folklorys kūpa “Ceidari” pīsadaleja sovā pyrmajā storptautyskuo folklorys festivala “Baltica” skatē.

Kūpys dzīduotuoji īt nu vysaidu Latgolys vītu – Aulejis, Baļtinovys, Bierzpiļs, Leivuona, Rūžupis, Stabuļnīku, Škilbānu, Vileks i cytu –, deļtuo “Ceidaru” repertuarā pamatā ir dzīsmis nu itūs vītu. Itamā vosorā kūpa īrakstejuse Bierzpiļs (voi kai tūlaik sauce – Domopolis) dzīduotuojim i dzīsmem veļteitu albumu “Dzīduotumi, ļustātumi”, kas ir kūpys pyrmais albums. Pyrma tuo studejā īraksteita viņ kūpeiga dzīsme ar dzīsminīku Kārli Kazāku “Zīmeņa, zīmeņa”, kas īkļauta etnomuzykys izlasē “SVIESTS 7”.

Albumā “Dzīduotumi, ļustātumi” īkļautys desmit dzīsmis, kū sovulaik dzīduojuši Bierzpiļs apleicīnē dzymušī dzīduotuoji – Anna Bundža, Anna Stiernīks, Bronislava Romanovska, Ciprians Pokrotnīks (zynoms ari kai literats Augusts Egluojs) i Marta Šmidte. Vysys dzīsmis jimtys nu LU Literaturys, folklorys i muokslys instituta Latvīšu folklorys kruotivis digitalajā arhivā http://garamantas.lv atrūnamūs materialu. Albums īraksteits studejā “Lauska” Reigā pi skaņu režisora Kaspara Bārbala. Albums byus daīmams popularuokajuos muzykys straumiešonys vītnēs nūsaklauseišonai kai stereo, tai ari “Dolby Atmos” telpiskuos skanis tehnologejuos.

“Ceidari ir viļni, kas rūnās, kod iudinī īmat akmisteņu. Tai i mes sovulaik īsuocem ar vīnu dzīsmi, bet asam aizaviļņuojuši jau da desmit godu, “Ceidarim” palīkūt par naatjemamu latgaliskuma gabaleņu, pošim nadzeivojūt Latgolā. Prīca, ka ar jaunū īrokstu asam spiejuši izceļt vēļ kaidys Latgolys vītys dzīsmis i pastuosteit pasauļam sovu sajiutu par tom,” soka folklorys kūpys vadeituoja Marta Sīle.

Īskandynojūt jaunū albumu i ari desmit godu pastuoviešonu, “Ceidari” aicynoj iz svātku koncertim Reigā i Bolvu nūvoda Bierzpilī. Catūrtdiņ, 2. novembrī, 19.00 stuņdēs koncerts “Dzīduotumi, ļustātumi” skanēs Reigā, Rakstnīceibys i muzykys muzejā (Pulka īlā 8) i koncerta gosti byus folklorys kūpys “Dāre” (Daugmale) i “Dandari” (Reiga), kai ari dzīsminīks Kārlis Kazāks. Sastdiņ, 4. novembrī, 15.00 stuņdēs “Ceidari” aicynoj iz sasatikšonu Bolvu nūvoda Bierzpiļs Saīta nomā, kur albums tiks izdzīduots kūpā ar folklorys kūpom “Saivenis” (Bierzpiļs) i “Rūžupis veiri” (Leivuona nūvods). Koncerti ir bez īīšonys moksys.

Bierzpiļs dzīsmem veļteituo albuma “Dzīduotumi, ļustātumi” īrokstu finansiali pabaļstejuse Vaļsts kulturkapitala fonda mierkprograma „Latvīšu viesturiskūs zemu atteisteibys programa“ i privatī zīduotuoji.

Video stuosts ap folklorys kūpu “Ceidari” i albuma īrokstu:

Print Friendly, PDF & Email

Kalenders

Mar
2
Sai
18:00 Latgalīšu kulturys goda bolva “B... @ Latgolys viestnīceiba "Gors"
Latgalīšu kulturys goda bolva “B... @ Latgolys viestnīceiba "Gors"
Mar 2 @ 18:00 – 20:30
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
21:15 Latgalīšu kulturys goda bolva “B... @ LTV1
Latgalīšu kulturys goda bolva “B... @ LTV1
Mar 2 @ 21:15 – 23:15
Kotru godu Latgalīšu kulturys goda bolvys “Boņuks” padūšonys ceremoneja ir na tik atsavieršona iz pārnajā godā padareitū, tok ari latgalīšu kulturā aktivūs ļaužu, interesentu i atbaļsteituoju sasatikšona i īsadvasmuošonys pasuokums. Bolvys “Boņuks 2023” padūšonys ceremoneja[...]
23:15 Kina “Cylvāka bārns” @ LTV1
Kina “Cylvāka bārns” @ LTV1
Mar 2 @ 23:15 – Mar 3 @ 01:00
Tei ir pyrmuo latgalīšu kina – Latgolā (Sakstagolā) filmāta i pošu latgalīšu spākim veiduota. Kina ir baļsteita iz Juoņa Klīdzēja romana ar taidu pošu nūsaukumu motivim. Stuosts par Latgolys Paulānu saimis dzeivi, par tradicejom i[...]