Pasuokumi Skotejā, daleiba LaLiGaBa žurejā i latvīšu dzejis izlase vuocyski – latgalīšu literaturys jaunumi

Pasuokumi Skotejā, daleiba LaLiGaBa žurejā i latvīšu dzejis izlase vuocyski – latgalīšu literaturys jaunumi

Roksta autore: Laura Melne, portals lakuga.lv

Itys rudiņs latgalīšu literaturā boguots ar nūtikšonom, kuruos īsaisteita Ligija Purinaša. Jei suokuse dorbu Latvejis Literaturys goda bolvys (LaLiGaBa) žurejā, oktobra vydā beja Skotejā, kur divejus vokorus piec kuortys pīsadaleja dzejis vokorūs kūpā ar fēru i skotu gēlu volūdā rokstūšajim autorim, taipat tikū Vuocejā izdūta latvīšu autoru dzejis izlasē, kurā puorstuovāti ari latgalīšu dzejnīki, tymā skaitā Ligija. 

18. oktobrī Edinburgā i 19. oktobrī Glāzgovā nūtyka fēru, latgalīšu i skotu gēlu dzejis vokors, kur izskanēja kai dzejūli originalvolūdā, tai tūs tulkuojumi angliski. Piečuok sekuoja ari daleibnīku diskuseja. Latgalīšu autorus obejuos reizēs puorstuovēja Ligija Purinaša, fēru volūdā rokstūšūs – Sisala Kampmana (Sissal Kampmann), sovpus skotu gēlu dzejnīki Martins Makintairs (Martin Macintyre) i Nials O’Galahers (Niall O’Gallagher) attīceigai pīsadaleja Edinburgys i Glāzgovys vokorā. Ligija stuosta, ka pasuokumu Glāzgovā vadeja skotu dzejnīks Alans Rīčs (Alan Riach), kurs pyrma tuo ari skotu nacionalajā medejā publiciejs eseju par itom treis mozajom volūdom i tūs literaturu (tū var puorskaiteit ITE). Klausūtīs cytu volūdu puorstuovūs, Ligija saleidzynuojuse tū ar latgalīšu pīredzi. “Maņ ruoduos prīškstots, ka skotu gēlu volūda vaira teik nūdūta nu tāva bārnim. Mums otkon bejuse tei “muotis škola pi rateņa” – latgalīšu volūda nūdūta nu muotis bārnim. Fēru soluos pīredze ir leidzeiga mums – otkon nūzeime ir sīvītei. Jī ari nasabeist nu sīviškuo spāka – juos ir emocionalys, atkluotys. Skoti ir drupeit pīzamātuoki, tok, ka ir gribiešona runuot, jī ari aktivi īsasaista,” Ligija smaida, ka jūks par introvertū latvīšu rakstnīku naasūt tik jūks, tai jei tī eistyn jutusēs.

Pasuokumu daleibnīku dzejis izlasis originalvolūdā i tulkuojumā angliski. Foto: nu Ligijis Purinašys personeiguo arhiva

Pyrmuo vokora daleibnīks Martins Makintairs pastuostejs, ka nimoz naasūt tik vīgli īsavuiceit raksteit skotu gēlu volūdā – tū Edinburgā vuicūt tik vīnā izgleiteibys īstuodē. Ari itei volūda vaira sasagloboj mutvuordu tradicejā, varbyut raksteituoju tamā ir pat mozuok, nakai latgalīšim. “Diskutiejom, ka nav jau tikai latgalīšim problemys ar rokstu volūdys prasmem, taidys ir ari fērim, lai ari mozuokys. Tok jim otkon nateik aktualizāta literatura. Teksti, kas nazkod pīraksteiti, ir kanonizāti, tok tryukst atteisteibys, kas ir mums. Jūs ari ir cīši moz, saleidzynojūt ar latgalīšim,” skaidroj Ligija. Jei ari tykuse pi nūpītnu atziņu par latgalīšu volūdys byušonu iz prīšku: “Mums vēļ prīškā cīši smogs dorbs, lai saglobuotu volūdu. Tys nav tik par tū, ka mes namuokom sasadorbuot, narokstom pietejumus voi nataisom vuordineicys. Golvonais, ka tu pīškir nūzeimi volūdai i dorbojīs kūpeiguos lītys lobā, mozuok ceļūt sovu “es” – ka es padareju tū voi itū –, bet vierzūtīs iz prīšku kūpeiguo mierka lobā.” Pats golvonais sacynuojums nu braucīņa iz Skoteju Ligijai ir apziņa, ka “tu ar sovu mozū volūdu naesi vīns”. Kotrai nu volūdu ir sovs unikalais stuosts, tok daudzys linejis – leidzeigys. Vyss ir īspiejams, tok vīnkuorši juodora. Par tū, ka situaceja ar latgalīšu volūdys i kulturys saprasšonu puorejā Latvejā palīk vys lobuoka, itūgod līcynojūt vairuokys kulturys nūtikšonys, nu kurūs vīna ir ari pošys Ligijis daleiba Latvejis Literaturys goda bolvys žurejā. Tyltu mesšonu nu Latgolys iz puorejū Latveju Ligija skaita par sovu aizdavumu.

Ligijis Purinašys kai LaLiGaBa žurejis puorstuovis portrets. Foto: Ruta Kurpniece

Latvejis Literaturys goda bolvys žurejā itūgod aktivi struodoj septeni ar literaturu saisteiti cylvāki. Bez Ligijis tamā ir ari kulturys žurnaliste i teatra kritike Undīne Adamaite, dzejnīks, atdzejuotuojs i muziks Pēteris Draguns, literaturzynuotneica i pietneica Madara Eversone, rakstnīks Osvalds Zebris, tulkuotuojs, atdzejuotuojs, publicists i rakstnīks Ilmārs Zvirgzds, kai ari rakstneica, dzejneica i tulkuotuoja Ieva Melgalve, kura ir ari žurejis ekspertu komisejis prīšksādātuoja. Ligija stuosta, ka prīcojās par itū vareibu i skaita tū par lelu pagūdynuojumu: “Eistineibā tys maņ beja cīši lels puorsteigums. Žurejis komanda ir cīši forša. Tys ari vyss, kū cikom kas varu pasaceit.”

Oktobra vydā Vuocejā izguojuse latvīšu autoru dzejis izlase vuocyski. Tamā atdzejuoti divpadsmit autoru (Annys Auzinis, Annys Belkovskys, Kristys Annys Belševicys, Madarys Gruntmanis, Valentina Lukaševiča, Anitys Mileikys, Arta Ostupa, Ingys Pizānis, Ligijis Purinašys, Agnesis Rutkēvičys, Māra Salēja i Tuoma Treiberga) dorbi. Diveju dzejnīku – Ligijis i Valentina Lukaševiči – dzejūli originali bejuši latgaliski. Tūs vysapyrma angļu volūdā iztulkuojs Džeids Vils (Jayde Will), tok tuoļuok vuocyski, izmontojūt originalu i tulkuojumu angliski, atdzejuojuši Astrida Niškauer i Kalle Laar. Kai soka Ligija, cīši svareigi, ka tei ir latvīšu dzejis izlase, kas nūzeimoj, ka kūpeigajā narativā īkļauti ari latgaliski rokstūšī autori. Naseņ juos dzeja tulkuota ari čehu volūdā.

Dzejis izlasis vuoks

Taipat Ligija pastuosta, ka cyta gods augustā gaidoms izdavuma “Avīzes Nosaukums” numers, kas veļteits taišni latgalīšu volūdai. Jei byuškūt tuo redaktore. Tikom aktualū “Avīzes Nosaukuma” numeri, kas izguojs itymā oktobrī, sagatavejuse “Volūdu sātys” komanda. Tys veļteits vysaiduokim ar volūdu saisteitim tematim. Tymā skaitā latgaliski i par latgalīšu volūdu roksta latgalīšu kulturys kusteibys “Volūda” puorstuovi, kai ari publicāti Raibuo i Marijis Dzeislys dorbi.

Print Friendly, PDF & Email

Kalenders

Mar
1
Pīk
all-day Izstuode “Latgales līgavas pūra ... @ Vīneibys noma Tradiceju sāta
Izstuode “Latgales līgavas pūra ... @ Vīneibys noma Tradiceju sāta
Mar 1 all-day
Izstuodē apsaverami folkloristis Intys Viļumys apkūpuotī prīškmati, kas rakstureigi 19. g. s. Vydslatgolys jaunivis pyuram. Nu jaunivis vaiņuka leidz pat dečam. Izstuode apsaverama kotru dorba dīnu nu 11.00 stuņžu, īprīšk sasazynojūt ar Tradiceju sātys puorstuovim[...]
19:00 Grupys “Galaktika” albuma prezen... @ Slampis kulturys piļs
Grupys “Galaktika” albuma prezen... @ Slampis kulturys piļs
Mar 1 @ 19:00 – 21:00
2024. gods zīmā i pavasarī – nu janvara da apreļa – popularuo šlagermuzykys grupa “Galaktika” dūsīs Latvejis koncerttūrē, kurys laikā tiks prezentāts ari jaunais albums “Mums pieder tik daudz”. Koncerti nūtiks gondreiž vysu Latvejis piļsātu[...]
19:00 Večerinka @ Gertrudis īlys teatris
Večerinka @ Gertrudis īlys teatris
Mar 1 @ 19:00 – 21:00
“Grodi” muzicēs i aicynuos doncuot vysus – muocātuojus i namuocātuojus, vacus i jaunus, garus i eisus. Spielēs mozuok i vaira zynomus Latgolys daņčus, rūtalis, dzīsmis. Vokora daņču meistars i sūļa īruodeituojs – Jevgenijs Mickēvičs.  [...]