Rokstu sagataveja: portals lakuga.lv

Izgleiteibys i zynuotnis ministreja Tīseibu aktu projektu portalā sabīdryskajai apsprīsšonai publicējuse Vaļsts volūdys politikys pamatpastatejumu 2021.–2027. eistynuošonys plānu 2024.–2027. godam.  Plānā paradzāti ari pasuokumi viesturiskuo latvīšu volūdys paveida ‒ latgalīšu rokstu volūdys ‒ atteisteibai i lībīšu volūdys kai vīneiguos pyrma dzeivuotuoju volūdys Latvejā saglobuošonai, kai tū nūsoka Vaļsts volūdys lykums.

Plāna mierkis ir nūdrūsynuot latvīšu volūdys kai vīneiguos konstitucionali nūsaceituos vaļsts volūdys ilgtspieju, tuos lītuojumu vysuos sabīdreibys darbeibys jūmuos, sekmejūt volūdys izpieti i volūdys resursu atteisteibu i digitalizaceju, styprynojūt sabīdreibys leidzdaleibu i individualū atbiļdeibu vaļsts volūdys politikys eistynuošonā. Plāns ītver vaļsts volūdys politikā četrūs godūs iz prīšku rysynojamūs vaicuojumus.

Plāns paredz, ka tuo rezultatā juobyun daīmamam digitalajam reikam deļ latgalīšu rokstu volūdys vuiceišonuos, papyldynuotam latgalīšu rokstu volūdys korpusam i sataiseitam mutvuordu tekstu korpusam. Taipat kai aizdavumi izvierzeiti latgalīšu rokstu volūdys saglobuošonys i atteisteibys vaicuojumu aktualiziešona i lītuojuma veicynuošona; latgalīšu rokstu volūdā i lībīšu volūdā izīmūšūs medeju darbeibys atbaļsteišona; latgalīšu rokstu volūdys i lībīšu volūdys vuiceibu daīmameibys vyspuorejuos izgleiteibys procesā fakultativajuos nūdarbeibuos (ari attuolynuoti) nūdrūsynuošona; atbolsta latgalīšu rokstu volūdys atteisteibai i volūdys konsultaceju daīmameibys nūdrūsynuošona; latgalīšu rokstu volūdys atainuošonys oficialajuos nūruodēs īvīsšona praksē; volūdys tehnologeju atteisteiba latgalīšu volūdys izpietei i vuiceišonai; atbolsta pasuokumi latgalīšu rokstu volūdys vuiceišonai vyspuorejā izgleiteibā; Latgolys vītvuordu latgaliskūs variantu apzynuošona i registriešona Vītvuordu datubāzē latgalīšu rokstu volūdā. Taipat teik paradzāts veicynuot jaunradi ari latgalīšu rokstu volūdā, kai ari papyldynuot Latvejis Nacionalū enciklopedeju ar saturu latgaliski.

Sabīdryskuo apsprīsšona īspiejama Tīseibu aktu projektu portalā da ituo gods 7. novembra. Ar plānu var īpasazeit ITE.