Rokstu sagataveja: portals lakuga.lv

Jau trešū godu Latgolys plānuošonys regions (LPR) aicynoj dasaslēgt tīšsaistē vierīneigajam goda nūgalis pasuokumam – “Latgolys dīnai 2023”, kas 8. novembrī nu 18.00 stuņžu byus apsaverams “Delfi Live” tīšraidē i LPR Facebook lopā ITE, viestej LPR puorstuovi.

“Latgolys dīna” ir veļteita Latgolys regiona uzjiemiejdarbeibys aktiviziešonai i atteisteibai, Latgolys puorstuovnīceibys darbeibys populariziešonai, taipoš ari uzjiemieju pīduovuotūs vareibu i Latgolys kai turisma golamierka prezentiešonai. Īprīšk “Delfi Live” tīšraidi nūsavārušys aptyvai 30 tyukstūšys ļaužu, sovpus kluotīnē Reigā pasuokumu apmeklēja ap 250 aicynuotūs gostu.

Pasuokuma laikā byus vareiba īpasazeit ar Latgolys muojražuotuoju i amatnīku pīduovuojumu, dazynuot par drūsmeigim Latgolys regiona uzjiemiejim, byus ari ļusteigūs Turku sīvu apdzīduošona, Ilonys Bagelis, Daiņa Skuteļa i cytu muokslinīku prīšknasumi. Pasuokumu vadeis atraktivais puors – digitaluo satura autors Lauris Zalāns i plaši zynomuo saimineica i Aglyunys Maizis muzeja eipašneica Vija Kudiņa.

Pasuokuma laikā jau dasmytū reizi tiks gūdynuoti ari Latgolys uzjiemiejdarbeibys centra organizātuo konkursa “Latgales reģiona uzņēmēju gada balva 2023” laureati. Ituo konkursa mierkis ir veicynuot Latgolys regiona uzjiemieju atpazeistameibu, plošsazinis leidzekļūs popularizejūt lobys uzjiemiejdarbeibys praksis pīmārus Latgolā. Konkursā paradzāts apzynuot ari eemigrantus, kuri piec ilgstūšys byušonys paceli atsagrīž Latvejā i suoc saimnīcyskū darbeibu.

Konkursā dasacejumus aicynuoja īsnēgt sevkuram uzjāmumam, kūpumā tiks padūtys bolvys ostoņuos nominacejuos: goda amatnīks, goda muojražuotuojs, goda jaunais turysma pakolpuojums, goda inovaceja, goda specialuos ekonomiskuos zonys uzjāmums Latgolā, goda uzjiemieguokais remigrants, goda lauksaiminīks i goda ražuošonys uzjāmums.