Paruodeit, ka latgalīšu volūda ir dzeiva – Ineta Atpile-Jugane pīduovoj pīcus video ar ailem latgaliski
Rokstu sagataveja: portals lakuga.lv
Ļaunūtīs literarim eksperimentim, kas paleidzātu dzejai aba ailem nūīt da skaiteituoju i klauseituoju, dzejneica Ineta Atpile-Jugane pīduovoj pīcus jaunus video ar ailem latgaliski. Meklejūt jaunus veidus i ceļus, kai ļaudim paruodeit aiļu pasauli, īspiejams, taišni video var byut eistais myusu laiku formats, stuosta Ineta.
Projektā “Dzeja runoj cytaižuok” dzejneica Ineta Atpile-Jugane ir raudzejuse uzrunuot klauseituojus i skateituojus cytaižuokā veidā. Projekts radeits ar Vaļsts kulturkapitala fonda Latvīšu viesturiskūs zemu atteisteibys programys atbolstu.
Ari da šam Ineta Atpile-Jugane ir vadejuse vysaida veida raksteišonys meistarklasis bārnu i jaunīšu auditorejom, pīmāram vokaluos studejis “Skonai” vosorys nūmetnēs, jaunīšu seminarā “Atzolys” i cytvīt. Ari ituo projekta primarais mierkis ir paruodeit, ka ailem var byut vysaiduoki formati, kuru deļ jaunīšim, īspiejams, var rastīs papyldu interese par dzeju i tekstu raksteišonu latgaliski.
Ļaunūtīs literarim eksperimentim, dzejneica Ineta Atpile-Jugane, izmontojūt sovus tekstus, sovu bolsu i daleibu video, radejuse pīcus videoklipus, kuru mierkis ir klauseituojūs i skaiteituojūs radeit interesi par dzejis pasauli. Videoklipūs izmontuotys ari dobys skanis i muzyka (VPG ambient aba Valērijs Prokofjevs) i fotografejis (autore Arita Atpile-Dona). Video operators ir Sergejs Čakāns. Sovpus aiļu video “Dzeive” izmontuota ari vizualizaceju generaceja ar muoksleiguo intelekta paleidzeibu “PIKA LABS AI”.
Tekstim latgaliski ir sataiseits ari tulkuojums angliski (tulce Gerda Mališeva), kas paplašynoj dzejis i latgalīšu volūdys izpratnis rūbežus. Aiļu video ir pīruodejums tam, ka latgalīšu volūda ir dzeiva i tamā var veiduot originalus, latgalīšu volūdu i dzeju popularizejūšus projektus, veicynojūt ari jaunradis procesu vierzeibu. Projektu paradzāts ari turpynuot, vizualizejūt cytys Inetys raksteituos ailis.
