Nūtiks foruma “Esi i dori” pasuokumi par drūseibu i izgleiteibu

Nūtiks foruma “Esi i dori” pasuokumi par drūseibu i izgleiteibu

Rokstu sagataveja: portals lakuga.lv

24. novembrī i 8. decembrī nūtiks Latgolys foruma “Esi i dori” kluotīnis sesejis. Vysapyrma Bolvūs tiks sprīsts par Austrumu rūbeža drūseibu, bet decembra suokuos – par aktualitatem vyspuorizgleitojūšajā i profesionalajā izgleiteibā, t. sk. par jaunuokū metodologeju digitalā veidā volūdom i nūvodvuiceibai, informej Latgalīšu kulturys bīdreibys vadeituoja Ilga Šuplinska.

Pyrmais pasuokums nūtiks kluotīnē 24. novembrī Bolvu Nūvoda muzejā. Pamatfokuss – kū var dareit sevkurs nu myusu, kab ir puorlīceiba, ka asam vīnuoti izpratnē par vaļsts aizsardzeibys vaicuojumim i zinim, kū kotrys nu myusu dareis, par kū atbiļdēs krīzis situacejā. Partū forumā aicynuoti pīsadaleit civiluos aizsardzeibys, drūseibys specialisti i eksperti, kai ari īstuožu, organizaceju vadeituoji, kab kūpeigi trenātu vajadzeiguos prasmis civiluos aizsardzeibys jūmā. Analizejūt Bolvu nūvoda situacejis i strategejis, tiks puorrunuoti ari kūpeigī aizsardzeibys viestejumi i izspālāti reiceibys scenareji.

1. decembrī drūseibys tematika tiks turpynuota tīšsaistis seminarā, kū varēs vērtīs Latgolys kongresa YouTube kontā. Tymā varēs aizdūt interesejūšūs vaicuojumus par drūseibys regionalajim, viesturiskajim, politiskajim, komunikacejis i informativuos telpys aspektim akademiskajim i medeju jūmys ekspertim: Sandrai Sprudzānei, Ingemāram Vekterim, Gatim Krūmiņam. Eipaši iz tīšsaistis diskuseju aicynuoti socialūs zineibu prīškmatu školuotuoji i vacuokūs klašu školāni.

8. decembrī kluotīnē Latgolys Industrialajā tehnikumā Daugovpilī paradzāts Izgleiteibys forums. Tys turpynuos jau augustā aizsuoktū temu par digitaluos izgleiteibys pozitivajom lītom i tryukumim, izgleituos daleibnīkus karjerys izvielē i karjerys izaugsmis nūsacejumūs, kai ari paruodeis vareibys jaunuokajā metodologejā volūdom i nūvodvuiceibai. Popularizejūt latgalīšu volūdys īīšonu školā, forums tiks nūslāgts ar jaunuokuos Oskara Seiksta gruomotys “Atīsmis” prezentaceju, kas pīduovoj naviņ autora jaunuokū dzeju i puordūmys par pamatvierteibom, tok ari raksturoj polonismu nūzeimi latgalīšu volūdys atteisteibā. Izgleiteibys seminarā aicynuoti pīsadaleit kai vyspuorizgleitojūšuos, tai profesionaluos i augstuokuos izgleiteibys puorstuovi. Byus ari diskuseja par pīaugušūs izgleiteibu, sokūt, cik izškireiga dzeivis kvalitatis nūdrūsynuošonai ir myužizgleiteiba.

Daleiba pasuokumūs ir bez moksys. Tymūs aicynuoti pīsadaleit kai vaļsts īstuožu darbinīki, tai piļsūniskūs organizaceju puorstuovi, kai ari Latgolys i cytu nūvodu dzeivuotuoji, kuri interesejas par vaļsts drūseibu i izgleiteibu.

24. novembra forumam daleibnīki ir aicynuoti pīsaregistrēt ITE, bet 8. decembra izgleiteibys forumam – ITE.

Print Friendly, PDF & Email

Kalenders

May
24
Pīk
22:05 Raibīs. Pyrma syltī. Zalta tesmi... @ Latvejis Radio 1
Raibīs. Pyrma syltī. Zalta tesmi... @ Latvejis Radio 1
May 24 @ 22:05 – 23:00
Raibīs. Pyrma syltī. Zalta tesmini. Radejis skaitejumi @ Latvejis Radio 1
Turpynojūt latgalīšu myusu dīnu literaturys īmyužynuošonys i populariziešonys dorbu, nu 21. da 24. maja Latvejis Radejis 1 eterā pyrmū reizi skanēs latgalīšu prozys dorbu izlase – stuosti i esejis, kuru autori ir Annele Slišāne, Valentins[...]
May
25
Sai
19:00 Grupys “Raxtu Raxti” i “Sinfonie... @ koncertzāle "Lielais Dzintars"
Grupys “Raxtu Raxti” i “Sinfonie... @ koncertzāle "Lielais Dzintars"
May 25 @ 19:00 – 21:00
Līpuojis koncertzālis pavasara sezonys nūslāgumā iz leluos skotivis varēs pīdzeivuot eipašu mageju, kū veiduos mejīdarbeiba tautys i akademiskuos muzykys vydā – grupa “Raxtu Raxti” i kamerorkestris “Sinfonietta Rīga” dirigenta Normunda Šnē vadeibā. Kūpeigajā koncertprogramā skanēs[...]