Rokstu sagataveja: portals lakuga.lv

Latgalīšu rokmuziks Sovvaļnīks klauseituojim pīduovoj jaunu dzīsmi “Par gaismu”, kuruos teksta autore ir dzejneica Anna Rancāne.

“Vaļsts svātki aiz mugorys, i tiuleņ suoksīs Zīmyssvātku bums ar lampeņu, spuļdzeišu, speiguleišu ryndom i breinumu gaideišonu. Itamā šaļtī storp lelajim svātkim i laikā, kod snīgs reši īprīcynoj myusu dvēselis, bet malnboltys biļdis daudzus kaitynoj sova palākuma dieļ, Sovvaļnīks izmantoj vareibu cylvākim pastuosteit “Par gaismu”,” saceits muzika izplateitajā viestī.

Dzīsmis autori ir Sovvaļnīks i Anna Rancāne. Īrokstā paleidzēja Gints Stankevičs, Mareks Gusāns i Vladimirs Lavrentjevs.

Sovvaļnīks ari atguodynoj, ka ar jū pavysam dreiži kluotīnē varēs sasatikt Oskara Seiksta dzejā aba Seiksta gruomotys “Atīsmis” attaiseišonys nūtikšonuos: 30. novembrī Lūznovā, 8. decembrī Daugovpilī i 13. decembrī Reigā.