Rokstu sagataveja: portals lakuga.lv

Animacejis kina Vydsmuižys Annužys acim” sovu pyrmizruodi pīdzeivuoja ituo gods 11. novembrī. Jaunizveiduotuo kina daleji ir kai animacejis, daleji kai akterkina, jo atseviški kadri ir ar bārnim nu Reigys i Viļānu. Kinys izveidē īsasaisteja 89 bārni, dorbojūtīs sešuos meistarklasēs deveņu školuotuoju vadeibā, viestej Viļānu Muzykys i muokslys škola.

Kinā tautysdzīsmis “Treis muosenis” pavadejumā teik stuosteits par Latgolys tautystārpu, tuo tapšonu, dzeivi i volkuošonu myusu dīnuos. Kinā latgalīšu kulturys i sadzeivis vierteibys paleidz atainuot zeimāts kačeits i suneits, Viļānu, Gaļānu, ceļa A12, Reigys i lidūstys ainovys. Kinys skoti i akteru dialogi ir latgalīšu volūdā. Kai tys ir īrosts Viļānu Muzykys i muokslys školys atbolsta bīdreibys kinuos, tuos titri ir ari angļu volūdā.

Kinu režisors Vīsturs Kairišs sovā atsauksmē par kinu pīzeist, ka tei ir saguojuse gona ospruoteiga i gudra, kuru pavysam nūteikti byutu vārts paturpynuot. Grupys “Dabasu durovys” solists Arņs Slobožanins pastreipoj, ka veiksmeiga saguojuse akterkinys i animacejis kombinaceja. “Ir svareigi nūdūt Latgolys goru ari bārnim, itys ir lobs formats, kas cytureiz der ari lelajim,” tai Slobožanins. Sovpus literaturzynuotneica Ilga Šuplinska pīzeist, ka kina ir breineiga vareiba bārnim vuiceitīs zeimiešonys, runuošonys, ari doncuošonys i tāluošonys prasmis i lobs veids kai dazynuot kulturviesturis faktus, izzynuot viesturi, taipoš ari tei natīši paleidz styprynuot latgaliskū identitati i latgalīšu volūdu.

“Tys ir kai stuovūs īmasts jauns audaklys, kuru jaunuo paaudze tuoļuok auss poši, tymā īaužūt sovys streipis i rokstu,” tai par animacejis kinu soka bīdreibys “Latgolys etnografiskuo viestnīceiba” vadeituoja i idejis autore Iveta Seimanova. Jei ari dasoka, ka kinys pyrmizruodē mozuo aktrise Agate sacejuse, ka niu jei zyna – meitys vīnūs kraklūs i puiši bez capuris nu sātys nikur! “Tod jau saīt, ka muns nūdūms, veidojūt itū kinu, ir sasnāgts,” skaidroj Iveta, kura poša izcyli puorzynoj tautys tārpu nosuošonys smolkumus i ar kinys paleidzeibu cer ituos zynuošonys nūdūt ari jaunuokajai paaudzei. “Maņ pošai itei kina beja lels izaicynuojums – izsapynuotū scenareju danest da rodūšuos komandys i redzēt, kai ainys puorsavierš kadrejumūs i mozī akteri struodoj nu sirds!” Iveta ari paskaidroj, ka bārnu zeimiejumi ir labi izadavuši, tok tūs ari ir gona daudz, deļtam tiks meklāti cyti rysynuojumi tūs izruodeišonai – teik plānuots, ka taps gruomota ”Nu Vydsmuižys da Mienesneicai”. Gruomotā tiks apkūpuoti Viļānu Muzykys i muokslys školys audziekņu veiduotī dorbi deļ ituos kinys, tok sižets i teksti, kab nabyutu atsakuortuošonys, byus cyti.

Itūšaļt kina ir izruodeita Reigā, taipoš nūsyuteita apsavieršonai ari latvīšu kūpīnom Australejā, Kanadā, Zvīdrejā, Vuocejā, Beļgejā, Ukrainā i cytvīt.

Fotogalerija: Animacejis kinys pyrmizruode, foto: Viļānu Muokslys i muzykys škola.