Folklorys kūpa “Upīte” struodoj pi jauna albuma izdūšonys

Folklorys kūpa “Upīte” struodoj pi jauna albuma izdūšonys

Rokstu sagataveja: portals lakuga.lv

Namaterialuos kulturys montuojuma centra “Upīte” folklorys kūpa “Upīte” suokuse dorbu pi jauna muzykys albuma izdūšonys. Kai stuosta FK “Upīte” puorstuovs Andris Slišāns, itūreiz albumā byus apkūpuotys kolhoza laikūs dzīduotuos dzīsmis, nu kurūs daļai tiks dūts jauns skaniejums. Ideja apkūpuot taišni kolhoza laiku dzīsmis rodusēs Katei Slišānei.

Itūšaļt folklorys kūpa “Upīte” aktivi struoduoj pi jauna albuma izdūšonys, kurā tiks apkūpuotys kolhozu laikūs dzīduotuos dzīsmis. Kai viestej FK “Upīte” puorstuovs Andris Slišāns, niu savuokts jau aptyvai 100 dzīšmu. “Mes izavielejam tuos kolhozu laiku dzīsmis, kuruos var nūlaseit nadaudz cytu pamata dūmu, na padūmu laiku slavynuošonu, daļai dzīšmu tiks dūts jauns skaniejums.” Jaunais albums tūp, pasasokūt Vaļsts kulturkapitala fonda projektu atbolstam.

Ideja apkūpuot taišni kolhoza laika dzīsmis roduos, digitalizejūt Ontona Slišāna dzīšmu vuokumus, kur atseviškom dzīsmem nabeja skaidra izceļsme, skaidroj Andris Slišāns. “Parunojūt ar myusu vacuokajom sīvom, juos atkluoja, ka tuos bejušys jūs jauneibys dzīsmis ap 50.-60. godim. Tai runojūt, vīna nu teicieju, Līvija Supe, atguoduoja, ka jai nu bierneibys ir treis kladis, kurys suoktys raksteit ap 16 godu vacumu, izaruod, ka sīvys par reizi ari zyna dzīšmu melodejis,” stuosta Andris Slišāns. Kūpumā teik plānuots īraksteit ap 36 dzīsmem.

Pyrmuo albuma dzīsme “Kara laukā” dalieji topuse, pasokūt Latvejis Nacionalajam kulturys centram, kurs jau treis godus snādz finansialu atbolstu Namaterialuos Kulturys montuojuma centram “Upīte” simpozeju organiziešonai. Kai stuosta Andris Slišāns, pyrmais simpozeja gods tyka veļteits muokslai, ūtrys – tekstilmuokslai i muzykai, sovpus itūgod beja goreigūs dzīšmu simpozejs. Ideja organizēt goreigūs dzīšmu simpozeju rodusēs piec sadarbeibys ar Ilzi Cepurnieci, kura, aizstuovūt sovu magistra dorbu par goreigajom dzīsmem, izavielēja FK “Upīte” kai dzīduotuojus. Nu tuo laika ari leidza guojuse ideja, ka goreiguos dzīsmis vajag koč kai apkūpuot, eipaši deļtuo, ka tuos vaira nateik dzīduotys. Apmeklejūt sīvys i vuocūt dzīšmu materialus, vīna nu sīvu, Lūcija Kaša, Baļtinovys bazneicā nu golvys suokuse dzīduot dzīsmis, kurys jei pīmiņ nu bierneibys, kai dzīduojuse juos baba. Tai ari rodusēs ideja salikt kūpā patriotiskū kolhoza laiku dzīsmi ar spieceigū goreigū dzīsmi. Dzīsmē “Kara laukā” sasadorboj folklorys kūpa “Upīte”, Dzintars Lipors i Marta Konevāle. Tekstu teiciejis – Līvija Supe i Lūcija Kaša. Dzīsme īraksteita “Bigmar’s Records” īrokstu studejā Upītē. Video vizualizaceju muokslinīks – Jēkabs Slišāns. Andris Slišāns ari dasoka, ka paraleli jaunuo albuma dzīšmu īraksteišonai turpynojās ari goreigūs dzīšmu simpozeja laikā īvuoktuo materiala digitaliziešona, tok ite juojam vārā, ka tik apjūmeigs dorbs nabyus dreizs, i dorbs pi digitalizacejis turpynuosīs vēļ vysmoz puora godu.

Niu FK “Upīte” plānoj kotra mieneša 21. datumā izlaist pa vīnai jaunai dzīsmei i video. Ari datums naasūt izvālāts najauši, partū ka itymā datumā dobā ir saulgrīži, kod nazkas puorsamej.


Print Friendly, PDF & Email

Kalenders

Mar
7
Cat
16:00 Valentina Lukaševiča gruomotys “... @ Latgolys Centraluo biblioteka
Valentina Lukaševiča gruomotys “... @ Latgolys Centraluo biblioteka
Mar 7 @ 16:00 – 17:30
7. martā 16.00 stuņdēs Daugovpilī, Latgolys Centralajā bibliotekā, 2. stuovā (Reigys īlā 22a) nūtiks Valentina Lukaševiča vītu stuostu kruojuma “Dīnvydlatgolys stuosti” prezentaceja i sasatikšona ar autoru. Gruomotys 39 stuostūs autors, ceļojūt na tik telpā, bet[...]