Rokstu sagataveja: portals lakuga.lv

Rotko muzejs Daugovpilī izsludynoj pīsasaceišonu kasgadejai Latgolys muokslinīku konkursa izstuodei “Lielgabalu klusumā”, viestej Rotko centra īsyutātuo informaceja.

“Kod lelgoboli runoj, muzys klusej” – itei fraze pādejuos desmitgadēs ir pīmynāta puoruok bīži. Puoruok bīži mūzom beja juoklusej, juopastuov maleņā, partū ka ir svareiguokys lītys, ar kū nūsadorbuot i par kū uzatraukt. Tok, par laimi, mes dzeivojam taidā ideologiskā godu symtā, kod muokslai vaira nav vajadzeibys tikai i vīneigi apmīrynuot pastuovūšuo režima dekorativuos napīcīšameibys. Muoksla aktivi komentej procesus i īsasaista sabīdryskuos dūmys veiduošonā. Kai radzams, sabīdreibuos, kuruos pastuov taida muokslinīcyskuo breiveiba, lelgobolu mutis nasataisa vaļā.

Lelgoboli ir ījāmuši tim pīsanuokušūs vītu muzeju pogolmūs, cikom realys kara šausmys napuorkuop ekranu rūbežus. Kab nūsorguot itū stuovūkli, Rotko muzejs aicynoj turpynuot radeit i veiduot sabīdreibu, kas ir spiejeiga kritiski izviertēt apleicejuos nūtikšonys. Sabīdreibu, kur nūsadūšona muzu valdzynuojumam ir pošsaprūtameiba, na grezneiba.

Ar taidu uzrunu Rotko muzejs aicynoj pīsaceit dorbus kasgadejai Latgolys regiona muokslinīku izstuodei, kura Rotko muzejā byus apsaverama nu 2024. gods 1. marta da 19. maja.

Kab pīsasaceitu izstuodei, da 2024. gods 21. janvara pusnakts juoaizpylda anketa Rotko muzeja sātyslopā ITE.

Īsnāgtajim dorbim ir juobyut minimalajā izmārā 60×80 cm, bez viersramys; ari grafikys lopys i foto aicynoj īsnēgt bez ramu; keramikys i tieļnīceibys dorbim vālamais minimalais izmārs ir 30x30x30 cm; bez īrūbežuojumu viertiešonai tiks pījimti tekstila, video, instalaceju dorbi i storpmedeju muokslys projekti. Dorbim ir juobyut radeitim 2022.-2024. godā.