Konkursa “Latgolys prozys skaitejumi” nūtikšonuos Reigā i Rēzeknē varēs satikt lobuokūs latgalīšu prozys raksteituojus

Konkursa “Latgolys prozys skaitejumi” nūtikšonuos Reigā i Rēzeknē varēs satikt lobuokūs latgalīšu prozys raksteituojus

Rokstu sagataveja: portals lakuga.lv

Nu 3. da 10. decembra nūtiks literaturys festivals “Prozas lasījumi”, kura laikā 4. decembrī Reigā i 7. decembrī Rēzeknē iz nūtikšonom – lekceju, diskuseju i literaturys konkursa nūslāgumu – aicynoj konkurss “Latgolys prozys skaitejumi 2023”. Kai viestej organizatoru publicātuo informaceja, ituo gods konkursā pīsadaleja rekordlels daleibnīku skaits – 21 raksteituojs, nu kurūs kai finalisti izalaseiti septeni daleibnīki. Konkursa nūslāguma pasuokumā “Proza i karbonadis”, kas paradzāts 7. decembrī Rēzeknē, tiks nūskaidruots ituo gods “Latgolys prozys skaitejumu” uzvarātuojs.

Lai veicynuotu literarū procesu Latgolā i latgaliski raksteitūs tekstu radeišonu Latvejā, jau catūrtū reizi latgalīšu kulturys kusteiba “Volūda” (bīdreiba “LgSC”) izsludynuoja konkursu “Latgolys prozys skaitejumi”. Konkursā beja aicynuoti pīsadaleit vysa vacuma Latgolys kulturtelpai pīdareigi autori, kurī roksta prozu. “Latgolys prozys skaitejumūs 2023”, kurūs devize beja “Es raksteišu, bet voi tu skaiteisi?” tyka sajimts 21 vysaidu autoru dorbs kai latvīšu literarajā, tai latgalīšu rokstu volūdā. Īsyuteitūs dorbus viertēja žureja, kurā beja literaturzynuotneica Ilga Šuplinska, rakstneica i redaktore Jana Egle, literaturzynuotnīks Valentins Lukaševičs, konkursa “Latgolys prozys skaitejumi” treis īprīškejūs godu uzvarātuoja Annele Slišāne, kai ari gruomotu blogere Inga Gedžūne. Konkursā par lobuokajim atzeiti literaturys telpā jau labi zynomu, kai ari vēļ naīpazeitu itaidu autoru – Alda Bukša, Ilzis Spergys, Vitys Briškys, Dāvida Rubena, Ilzis Aizsilys, Sarmītis Trūpys i Egitys Kancānis – prozys dorbi. Konkursa uzvarātuojs tiks paziņuots 7. decembrī konkursa nūslāguma pasuokumā Rēzeknē.

Ituo gods konkurss “Latgolys prozys skaitejumi” padora plotuokus konkursa rūbežus i aicynoj iz vairuokom nūtikšonom. Pyrmūdiņ, 4. decembrī, 18 stuņdēs kulturvītā “Volūdu sāta” Reigā (Olūtu īlā 33) byus literaturzynuotnīka Valentina Lukaševiča lekceja ap latgalīšu literaturys viesturi i tai veļteituos literatu stuostu sadalis portalā lakuga.lv prezentaceja, bet par reizi piec tuos, 19.00 stuņdēs, tīpat nūtiks saruna-diskuseja ap raksteišonu latgaliski i tulkuojumim “Es rokstu, bet voi tu skaiteisi?”. Diskusejā pīsadaleis literati Ilze Sperga, Aldis Bukšs, Valentins Lukaševičs, literaturzynuotnīks Jānis Vādons i volūdnīks, “Volūdu sātys” vadeituojs Snorre Karkonens Svensons. Sarunu-diskuseju vadeis latgalīšu kulturys ziņu portala lakuga.lv redaktore Laura Melne. Taipat dīnu pyrma ituo, 3. decembrī, 17 stuņdēs festivala “Prozas lasījumi 2023” atkluošonā Reigā, bārā “1983” (Vagonu īlā 21), pīsadaleis īprīškejūs treis godu konkursa “Latgolys prozys skaitejumi” uzvarātuoja Annele Slišāne.

Sovpus catūrtdiņ, 7. decembrī, 19 stuņdēs Rēzeknē, “IGGI bārs & karbonādes” (Atbreivuošonys alejā 95C) byus “Latgolys prozys skaitejumu 2023” nūslāguma pasuokums “Proza i karbonadis”, iz kuru kluotīnē voi tīšraidē aicynuots kotrys grybātuojs. Nūtikšonā pīsadaleis prozys skaiteituoji: Vita Briška, Dāvids Rubens, Ilze Sperga, Sarmīte Trūpa i Ilze Aizsila, muzicēs grupa “Gandreiž 10nīkā”, bet nūtikšonu vadeis Kārlis Taranda. 7. decembrī tīšraidē konkursa “Latgolys prozys skaitejumi 2023” nūslāgumu varēs vērtīs latgalīšu kulturys ziņu portalā lakuga.lv, kai ari latgalīšu kulturys kusteibys “Volūda” i storptautyskuo festivala “Prozas lasījumi” lopuos socialajā teiklā “Facebook”. Lobuokūs konkursa dorbus piečuok varēs puorskaiteit portalā lakuga.lv, bet konkursa uzvarātuojs svātdiņ, 10. decembrī, 17 stuņdēs pīsadaleis literaturys festivala “Prozas lasījumi” nūslāguma pasuokumā Reigā, kulturys centrā “M/Darbnīca” (A. Briāna īlā 9).

Konkursa žurejis puorstuove literaturzynuotneica Ilga Šuplinska, komentejūt īsnāgtūs dorbus, soka: “Itūgod ir lobuoki i volūdys ziņā izkūptuoki dorbi. Var saceit, ka viņ kūpeigais tāls, kompoziceja, originalitate sižetā ci puordzeivuojumā ļuove izaškiert, kam dūt drupeit augstuoku viertejumu. Pateik, ka dorbūs ir myusdīneigs skatejums, ka latgalīšu volūda nav tik pasavierīņs iz babu i dzedu voi sovu bierneibu, ka jimā dzeivoj, partū tei ir socialūs teiklu i kasdīnys volūda. Itū reizi vaira dorbu ar humoreigu, vīglu ci smoguoku, pašironiskuoku pasasmīšonu par sevi, seve atrasšonu ci pagaisynuošonu.” Literaturzynuotnīks Valentins Lukaševičs, viertejūt konkursu i tuo dorbus, pīzeist: “Nagaideiti daudz dorbu, nagaideiti laikmeteigi. Vairums tekstu taidā emocionalā i asociativā plyudumā, bet ir ari, kur dominej dialogi, kur izasprauc sižets. Puorsteidzūši daudz guļbu tolku, ari datoru i modernūs komunikaceju. Tematiski, volūdyski, stilistiski dyžon plots diapozons, tys prīcej. Īsnāgtūs tekstu potencials raisa nūceju, ka latgalīšu literatura nav nūmyruse.”

Konkursu “Latgolys prozys skaitejumi 2023” organizej latgalīšu kulturys kusteiba “Volūda” (bīdreiba “LgSC), tū atbolsta literaturys festivals “Prozas lasījumi 2023” (Latvejis Rakstnīku savīneiba), Vaļsts kulturkapitala fonds, SIA “IGGI”, Volūdu sāta, latgalīšu kulturys ziņu portals lakuga.lv i žurnals “Domuzīme”. Prozys skaitejumu diskuseju atbolsta Sabīdreibys integracejis fonds nu Latvejis Republikys Kulturys ministrejis daškiertūs vaļsts budžeta leidzekļu.

Festivals “Prozas lasījumi” nūteik nu 1995. goda, tū organizej Latvejis Rakstnīku savīneiba. Laika gaitā “Prozas lasījumi” nu nalela pasuocīņa Andreja Upīša dzimšonys dīnys pīmiņai izauguši vairuoku dīnu prozys festivalā, kura programā ar sovu jaunuokūs dorbu voi jūs fragmentu skaitejumim pīsadola vysaidu paaudžu Latvejis i cytu vaļstu rakstnīki. Catūrtū reizi sadarbeibā ar festivalu tymā byus nūtikšonys ar Latgolys kulturtelpys autorim.

Print Friendly, PDF & Email

Kalenders

May
30
Cat
13:00 Daugovpiļs piļsātys svātki @ Daugovpiļs
Daugovpiļs piļsātys svātki @ Daugovpiļs
May 30 @ 13:00 – Jun 2 @ 19:00
Nu 31. maja da 2. juņa Daugovpiļs piļsāta svieteis sovu 749. dzimšonys dīnu, aicynojūt daugovpilīšus i gostus iz kūpeigom svineibom – piļsātys svātkim „Mana pils – Daugavpils!”. Treis dīnu garumā byus vareiba baudeit vysaidys koncertprogramys,[...]
13:00 Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
Sasatikšona ar Juri Cybuli @ Reigys Centraluos bibliotekys Grīziņkolna filialbiblioteka
May 30 @ 13:00 – 14:30
30. majā 13.00 stuņdēs RCB Grīziņkolna filialbiblioteka (Alauksta īlā 10) aicynoj iz sasatikšonu ar Juri Cybuli. Jurs Cybuļs ir volūdnīks, tulkuotuojs, publicists i školuotuojs, kurs vaira nakai 40 godu pietej i kolekcionej ābecis. Jurs Cybuļs[...]