Rokstu sagataveja: portals lakuga.lv

Itūgod latgaliskuo rokenrola grupa “Gandreiž 10nīkā” svietej 10 godu jubileju i 1. decembrī 20.00 stuņdēs sevkuru klauseituoju aicynoj iz jaunuo albuma prezentacejis koncertu Rēzeknis nūvoda Kaunatys pogosta tautys nomā.

Jaunais grupys “Gandreiž 10nīkā” albums ir ūtrei daļa nu treiskuoršuo albuma. Pyrmuo albuma daļa ar nūsaukumu “Nasoki nikuo” klauseituojim tyka atruodeita 2017. godā. Kai stuosta grupys liders i vokalists Juoņs Kuzminskis, piec drupeit vaira kai treis godu rodūšuo puortraukuma gribiejuos atsagrīzt vēļ jaudeiguok i skaļuok, deļtuo jaunuo albuma skanis byus vēļ drupeit trokuokys i ar dreizuokom dzīsmem. Nu deveņu albuma dzīšmu tik divejis byus drupeit liriskuokys i mīreiguokys. Itūšaļt grupys sastuovs ir: vokals i gitara – Juoņs Kuzminskis; bass – Ingars Gusāns; bungys – Mareks Gusāns.

Kotra nu treiskuoršuo albuma daļu sastuovēs nu deveņu dzīšmu. Itys cypars pajimts ar nūdūmu, kab beiguos saīt skaitlis 27, idejiski attālojūt “27 Club” aba latgaliski “Klubs 27”, kas ir naformals saroksts ar slovonim muzikim, kuri nūguojuši cytā saulē 27 godu vacumā.

Jaunajā albumā ar nūsaukumu “Gribu” byus dzīsmis “Motobloks”, “Rūdis+Anda”, “Vīna nota”, “Beha iz kreita”, “17 vuordu”, “Gribu”, “Panki doncoj”, “Zaļais albatross” i “Imants”. Dzīsmē “Imants” tolkā īt ari DJ Guntix, kurs sovā stilā īrunuojs atseviškys teksta frazis. Albums īraksteits Valmīrā, dzīšmu tekstu autors ir Juoņs Kuzminskis.

1. decembrī 20.00 stuņdēs grupa aicynoj iz albuma prezentaceju Rēzeknis nūvoda Kaunatys pogosta tautys nomā. Kai eipašī gosti byus grupa “Reibums”, kai interesants fakts – niulejais “Reibums” sastuovs ir praktiski taids pats, kai suokūtneji grupai “Gandreiž 10nīkā”. Īīšona pasuokumā bez moksys.