Ligija Purinaša. Es grybu byut upe

Ligija Purinaša. Es grybu byut upe

Dzejūļu autore: Ligija Purinaša

Pīduovojam portala lakuga.lv skaiteituojim Ligijis Purinašys jaunuokūs dzejūļus. Par tim poša autore soka tai: “Itūgod es daudz dūmoju par upi kai dzeivis simbolu. Ka vysu myužu cyti maņ ir sacejušs, ka es asu azars, muorks i gruovs, koč i es asu upe. Ar sovu straumi i sovu ritmu. Stuovim krostim i dziļu šmiļkti. Kai vosorā īkuopu Pededzis upē, tai, ruodīs, naasu nu tuos izkuopuse. I vys jau itī teksti ir par sevis pījimšonu, i tū, ka, škārsojūt upi napareizā vītā, var vys tik gadeitīs īkrist kaidā atvorā.”

***

ap mani sabīzej skumis
kai nalobys īdūmys
prīšknūjautys stuosta
vyss byus labi
pruots klaigoj
kai naapturama
viļcīņa sviļpe

es stuovu zam viadukta
kai zam dabasu
kas tiuleņ sabruks
zam munu cereibu svora

***

myglys sirenai

mes asam krusa
mes sytomēs pret jiusu styklim
kai perpendikulari nūgrīžņu stori
taisnleņka hipotenuzys
i intergalaktiskuos nūjausmys
izkaļs iz mīsys pīdereibys zeimis

mes asam švakys meitinis
mes napasadūdam ciklonim

***

pasaruodu kai breinums
kuru apstyprynuojs svātais krāslys

jaunova marija fatimā
jaunova marija lurdā
jaunova marija izstuodis atkluošonā

tu meklej munu seju biļdēs
it kai tevi sasiļdeitu pikseli ekranā
voi munys sagurušuos rūkys

es nūvalku sovu lauleibys riņči kai
poļsterātu kryušturi

***

vīntuleibys sajiuta kai augļapvalks
mani sorgoj nu pasauleigu lītu
mainās muni sorgi jūs vuordi varbyut jiutys
bet augļapvalks ar kotru godu vaira sacītej

navylynoj statuss variešona
nainteresej slave i nazkū pīruodeit
varbyut ari dasaskaršona myužeibai
ir oploma līta kuru asu puorviertiejuse

dabasu acs verās taišni
munā zvaigznē
kū tu meklej meitineit
kas cauraudzs tovu augļapvalku
i kaidi atspriekleņ zīdūši zīdi tū caurtrīks
augdami iz leju

***

pyrma aizbraukšonys
es devalveju vysys
attīceibys

atmiņu reabilitacejis procesā
cītušī nav atrosti

***

tymā godā mes braucem pa šoseju i rūbežsorgi myus apturēja
aļni staiguoja gar gruovim
i lopsys dzyna pādus
es nikuo navaru padareit
es nikuo navaru padareit
dažaidu īmaslu dieļ
es asu puorsavārtuse par svātu goru
tu mani naredzi bet es asu vysur
apgluosteišu tovu seju
apčeršu tovus placus
i ka vajadzēs jimšu rūkā sokumus
i nūsastuošu ar tevi pyrmajā linejā
es tycu tovim vuordim
es tycu tovim vuordim
es tycu tovim vuordim

varbyut mīlesteiba ir rikošets i sauta bryuce
varbyut mīlesteiba ir kai voduotuojs i trauksme
varbyut mīlesteiba mani meklej i naatrūn
varbyut tei ir škeiba mīlesteiba
varbyut tei ir oploma mīlesteiba
varbyut tei ir nalaika mīlesteiba
es grybu byut upe
Styglovys grova Reitupe
rūbežupe storp lobu i ļaunu
es grybu tecēt sovā vierzīnī
es asu svieteits iudiņs
es asu tovs iudiņs
es asu
es

es naīguoju duorzā
es paguoju garum pa stidzeņu
nūsagrīžu pi zeimis PIEROBEŽAS JOSLA

mani nivīns nanūzags
mani nivīns naaizviļs
ka papraseisi
es byušu ar tevi
pyrmajā linejā


Print Friendly, PDF & Email

Kalenders

Jun
19
Tre
13:00 Latgolys muzykys i muokslys vyds... @ Latgolys viestnīceiba "Gors"
Latgolys muzykys i muokslys vyds... @ Latgolys viestnīceiba "Gors"
Jun 19 @ 13:00 – 15:00
Marts Dreļs – Koncertprograma “Cikliskās pārdomas”. Marts muzykali īsatekmiejs nu tautys, džeza i akademiskuos muzykys. Koncertā izskanēs div Marta Dreļa originalkompozicejis: “Aiz stūra” i “Kādā veidā?”. Marta muzykalī celi nuokūtnē vess iz Kopenhagenu, kur jis[...]
Jun
20
Cat
15:00 Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Etnografejis izstuodis “Atpakaļ ... @ Daugovpiļs Nūvodpietnīceibys i muokslys muzejs
Jun 20 @ 15:00 – 16:30
20. junī 15.00 stuņdēs Daugovpiļs Nūvodpietnīceibys i muokslys muzejā tiks atkluota etnografejis izstuode nu muzeja kruojuma “Atpakaļ mājās”. Izstuodē eksponāti autentiski prīškmati, kas tyka lītuoti 20. g. s. pyrmajā pusē – dorbareiki, sadzeivis prīškmati. Etnografejis[...]