Turpynojās dorbs pi gruomotys par Daugovpiļs muokslinīkim
Rokstu sagataveja: portals lakuga.lv
Daugovpiļs Nūvodpietnīceibys i muokslys muzejs (DNMM) turpynoj dorbu pi gruomotys par Daugovpiļs muokslinīkim izdūšonys. Itūgod nūsasliedzs projekta ūtrais pūsmys i sataiseits gruomotys makets. Izdavuma autori tur nūceju, ka cytugod tys ari tiks pi skaiteituoju.
Gruomota “Daugavpils mākslinieki” atspīgeļuos profesionalūs muokslinīku veikumu Daugovpilī symtu godu laika pūsmā nu 1924. da 2023. gods. Sovpus muokslinīku atlase itam izdavumam tyka baļsteita iz Daugovpiļs Nūvodpietnīceibys i muokslys muzeja muokslys kruojumā asūšajim dorbim, kas ir itūšaļt objektivuokais olūts itaida veida apkūpuojumam. Muokslys kruojumā niu atsarūn ap 1000 muokslinīku dorbu, kas atspīgeļoj godu symtu ilgu laiku pūsmu Daugovpilī kulturviesturiskā grīzumā. Muokslys dorbi ir kai laikmata līcinīki, kas natīši raksturoj sabīdryskū dzeivi i ari puormainis kulturys jūmā.
Bolstūtīs muzeja materialūs i muokslinīku īsyuteitajūs dzeivis guojumūs, Mairita Folkmane, Valda Mežbārde i Valentīna Slavkovska apkūpuoja muokslinīku biografiskūs datus, sastateja anotacejis, atlaseja nūdaļu ilustrejūšuos fotografejis. Pi gruomotys tapšonys struoduoja: redaktoris Valentīna Liepa i Valentīna Slavkovska, latvīšu volūdys korektoris Indra Delvera-Rožlapa, Dace Lāže, tulcis Inga Gedžūne i Bronislava Kalniņa, angļu volūdys korektore Sandra Meškova, fotografs Jurijs Berdnikovs. Gruomotys dizainu i maketu veiduoja Marta Folkmane. Tyka izmontuotys fotografejis nu DNMM kruojuma i muokslinīku personeigūs arhivu.
Mairita Folkmane nūruoda, ka ilgtermiņā itys projekts paradz popularizēt i veicynuot Latgolys kulturys montuojuma apzynuošonu i saglobuošonu. Partū jei izsoka nūceju, ka dreizumā itei gruomota tiks izdūta, ļaus īsamirdzēt Daugovpiļs muzeja vierteibom i reizē ceļs Latgolys dzeivuotuoju, kai ari kulturys jūmys puorstuovu – muokslinīku i muzeja darbinieku – pošapziņu.
Projekts eistynuots, pasasokūt Vaļsts kulturkapitala fonda mierkprogramys “Latvīšu Viesturiskūs zemu atteisteibys programma” projektu konkursa “Latgolys kulturys programa 2023” atbolstam.
