Rokstu sagataveja: portals lakuga.lv

Tradicionaluos dzīduošonys grupa “Saucējas” pošā novembra golā publiciejušys vasareigu videoklipu Kuorsovā pīraksteitajai dzīsmei “Kiukoj, uoru dzagiuzeite”. Dzīsme ir nu grupys 2021. godā izdūtuo albuma “Dabā”.

Kai publiskajā īrokstā sovā profilā socialajā teiklā “Facebook” sok grupa, tod klips fiļmāts kaidā korstā augusta piecpušdīnē. “Brīnūt niu pa pabīzū snīga kuortu, atguodojam korstū augusta piecpušdīni, kod fiļmiejom Kuorsovā pīraksteituo dzagiuzis bolsa “Kiukoj, uoru dzagiuzeite” videoklipu. Patriotu mienesi nūslādzam, apcerejūt sovu nūzeimi Latvejā, tuos tradicejuos i viesturē,” roksta “Saucējas”.

Dzagiuzes bolss “Kiukoj, uoru dzagiuzeite” ir pavasara i vosorys breivdobys dzīduošonai rakstureiga dzīsme. Tū “Saucējas” atrodušys Latvīšu folklorys kruotivis digitalajā arhivā – dzīsme pīraksteita 1958. godā nu Kuorsovys piļsātys etnografiskuo ansambļa. Audio formatā “Saucēju” dzīduojumā tei publicāta 2021. godā izdūtajā albumā “Dabā”, tei dzīduota īrokstu sesejā Sāvienys piļskolnā. Vaira par albumu “Dabā” var skaiteit ITE.

“Saucējas” soka, ka ar itū dzīsmi grib izsvērt tradicionaluos dzīduošonys eipašeibys, kaidys tei daboj, dzīdūt breivā dobā – dzīsme palīk maiguoka i sasabolsoj ar ainovys akustiku. Sovpus dzīsmis saturs caur personeigu – jaunys meitinis puordzeivuojumu – viestejūt par sovim karā kritušajim bruolim, kū dzīsmēs saleidzynoj ar nūcierstu bierzi.

Dzīsmis “Kiukoj, uoru dzagiuzeite” videoklipu taisejs Pēteris Reiters, bet dorbus pi tuo pabaļstejs “Latviešu fonds”.