Rokstu sagataveja: portals lakuga.lv

Pi skaiteituoju tics žurnala “A12” decembra/janvara numers i tymā var puorskaiteit sarunys ar Jura Soikāna Ludzys muokslys školys direktori Sandru Vorkali, kinu režisoru Ivaru Selecki, tekstilmuokslineicu i pedagogi Daci Pudāni i cytys sarunys i stuostus.

Žurnala “A12”, kas ir vīneigais žurnals, kas viestej par Latgolys ļaudim i jūs stuostim, redaktore Ināra Groce ituo numera īvodā soka: “Radeit, asūt komfortā, reši izadūd, koč kam byus juopuorkuop puori. Tei variešona rūnās, puorkuopūt navariešonu, storp saprasšonu i nasaprasšonu, storp īrostū i naīrostū. Taida variešona jau kotram īškā ir, tik kasdīnys klopotu apbružuota. Ka dzeivi pījam Imanta Zieduoņa vuordim, ka “finiša nav i nabyus, ir tik starts”, tod golvonais, kab nav baist pīlaist klaidys. Beistūtīs nu klaidu, daudzys izdeveibys aizīt garum, tuos cytu dīnu var ari naatīt. Juoatrūn variešona byut par lobuoku i laimeiguoku na tik sev i cytim, tok, kab cik cīši tys skanātu, ari Latgolai. Caur sevi var puormeit tū, kas ir apleik.”

Žurnala “A12” decembra/janvara numerī skaitit:

• sasatikšona ar vacuokū aktivi struodojūšū dokumentaluos kinys režisoru Eiropā Ivaru Selecki;
• svātku nūskaņuos saruna ar amatneicu Inu Vaikuli par skaistū, kas īt nu dobys i vysu lobū, kas juodora pa saulei;
• barikažu gaišuos nakts atguodoj bieržgalīši Arvīds Dunskis, Elita Tripane i Jurs Skruļs;
• kai muoksla i dzymtys saknis paleidz dzeivuot Dacei Pudānei;
• Kristina Andža doluos puordūmuos, kū nūzeimoj veiduot atpazeistamu digitalū saturu;
• žurnala piļsātvidis pietnīks Ivars Matisovs ceļoj pa Daugovpili liktiņupis kreisajā krostā;
• kai vairuot tū, kas myus vīnoj – saruna ar Sandru Vorkali.

Jaunuokajā žurnalā “A12” vysu rokstu vydā ari portala lakuga.lv redakcejis komandys taiseitī stuosti – itūreiz ar Nacionaluos elektroniskūs plošsazinis leidzekļu padūmis lūcekli Ievu Kalderausku sasarunuoja žurnaliste Marta Puzāka, bet interveju ar tekstilmuokslineicu i pedagogi Daci Pudāni sagatavejuse lakuga.lv redaktore Laura Melne. Taipat žurnalā puorskaitoma portala redakcejis sagataveituo informaceja par jaunuokajim muzykys i gruomotu izdavumim.

Žurnals “A12” ir vareiba jau vaira nakai 10 godus izzynuot par dzeivi i ļaudim Latgolā i pasaulī, puorskaiteit dažaidus dzeivisstuostus, pīsadaleit viesturiskūs ceļuojumūs laikā i telpā, kai ari byut atkluojumu i puordzeivuojumu dalinīkim. Žurnals izīt 6 reizis godā. Kab atbaļsteitu žurnala byušonu ari iz prīšku, aicynojam abonēt. Jaunuokū žurnala numeri var nūpierkt (kai digitalā, tai taustomā veidā) ite: a12.lv.